ދެކުނު އެފްރިކާގައި މިހާރު އެންމެ ފުޅާކޮށް ފެތުރިފައިވާ ވޭރިއެންޓަކީ އޮމިކްރޯން ކަމަށާއި އޭގެ ސަބަބުން ކޭސްތައް ކުއްލިއަކަށް ވަރަށް ބޮޑަށް އިތުރުވާން ފަށާފައިވާ ކަމަށް ސިއްހީ އޮފިޝަލުން ބުނެފި އެވެ.
ކޮވިޑް ފަތުރާ ވައިރަހުގެ އާ ވޭރިއެންޓު، އޮމިކްރޯން، އެންމެ ފުރަތަމަ ފެނުނީ އެފްރިކާ ބައްރުގެ ދެކުނުގެ ގައުމުތަކުންނެވެ. އެކަން ރަސްމީކޮށް އިއުލާނު ކުރީ ދެކުނު އެފްރިކާގެ ސައިންސްވެރިންނެވެ.
އެންމެ ފަހުގެ ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި 8،500 އާ ކޭސް ރިޕޯޓުކުރި އެވެ. އެއީ އޭގެ ކުރީ ދުވަހުގެ 4،300 ކޭސްއާ އަޅާ ބަލާއިރު ދެ ގުނަ އިތުރެވެ.
ދެކުނު އެފްރިކާގެ އިސް ސައިންސްވެރިއަކު ބީބީސީ އަށް ބުނީ މީގެ ދެ ހަފުތާ ކުރިން ދުވާލެއްގެ މައްޗަށް ރިޕޯޓުކުރަމުން ދިޔައީ 200 އާއި 300 އާ ދެމެދުގެ ކޭސްތައް ކަމަށެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައިވާ ގޮތުގައި 24 ގައުމަކުން އޮމިކްރޯން ވޭރިއެންޓު ފެނިފައިވެ އެވެ. މިއީ ގިނަ މިޔުޓޭޝަންތައް ހިމެނޭ ވޭރިއެންޓެކެވެ.
ދެކުނު އެފްރިކާގެ ނޭޝަނަލް އިންސްޓިޓިއުޓް ފޯ ކޮމިއުނިކެބަލް ޑިޒީޒަޒް (އެންއައިސީޑީ) އިން ބުނީ މިދިޔަ މަހު ސީކުއެންސް ކުރި ވައިރަސް ޖިނޯމްގެ 70 ޕަސެންޓުން ފެނުނީ އާ ވޭރިއެންޓު ކަމަށެވެ.
އެންމެ ފަހުން އެ ވޭރިއެންޓް ފެނިފައި ވަނީ އިންޑިއާ، ގާނާ، ސައުދީ އަރަބިއްޔާ އަދި ޔޫއޭއީ އިންނެވެ. އިނގިރޭސިވިލާތާއި، އެމެރިކާ އަދި ޖަރުމަނުން ވެސް ވަނީ ކޭސްތައް ފެނިފަ އެވެ.
އޮމިކްރޯންއާ ގުޅޭ ގިނަ ސުވާލުތަކުގެ ޖަވާބު އަދިވެސް ނުލިބެ އެވެ. އެގޮތުން މިހާރު ހުރި ވެކްސިންތަކުން އެ ވޭރިއެންޓާ ދެކޮޅަށް ލިބޭނެ ރައްކާތެރިކަމާ ގުޅޭ ސުވާލުތަކަށް ވެސް ޖަވާބެއް ހޯދިފައެއް ނުވެ އެވެ.
ޑަބްލިއުއެޗްއޯ އިން އެ ވޭރިއެންޓު ހިމަނާފައި ވަނީ "ކަންބޮޑުވާން ޖެހޭ ވޭރިއެންޓުތަކުގެ" ކެޓެގަރީގަ އެވެ. މިހާތަނަށް ހެދި ދިރާސާތަކުން ދައްކާ ގޮތުގައި އެ ވޭރިއެންޓުގެ ސަބަބުން އެއް ފަހަރަށް ވުރެ ގިނައިން ބަލި ޖެހުމުގެ ފުރުސަތު ބޮޑު ކަމަށް ޑަބްލިއުއެޗްއޯ އިން ބުނެ އެވެ.
