އިންޑިއާ އަށް އެތެރެވި ދެ މީހެއްގެ ހަށިގަނޑުން ކޮވިޑް ފަތުރާ ވައިރަހުގެ އޮމިކްރޯން ވޭރިއެންޓު ފެނިފައިވާ ކަމަށް ކަރްނާޓަކާ ސްޓޭޓުގެ ސަރުކާރުން ބުނެފި އެވެ.
މިއީ މުޅިން އަލަށް ފެނިގެން އުޅޭ ވޭރިއެންޓާ ގުޅުން ހުރި ކޭސްތަކެއް އިންޑިއާ އިން ފެނުނު ފުރަތަމަ ފަހަރެވެ. އެ ވޭރިއެންޓު އެންމެ ފުރަތަމަ ފެނުނީ އެފްރިކާގެ ދެކުނުގެ ގައުމުތަކުންނެވެ.
ކަރްނާޓަކާ ސަރުކާރާ ހަވާލަދީ ޓައިމްސް އޮފް އިންޑިއާ ނޫހުން ބުނީ އިންޑިއާ އަށް އެތެރެވި ދެ ފިރިހެނެއްގެ ހަށިގަނޑުން އޮމިކްރޯން ވޭރިއެންޓު ފެނިފައިވާ ކަމަށެވެ.
ދެ މީހުންނަކީ ވެސް އެހެން ގައުމެއްގެ ރައްޔިތުންނެވެ. ނަމަވެސް އެއީ ކޮން ގައުމެއްގެ ބަޔެއް ކަމެއް އަދި ސާފެއް ނޫނެވެ. ވޭރިއެންޓަށް ޓެސްޓު ކުރަން ޖިނޯމް ސީކުއެންސިން ހެދީ ކޮވިޑާ ގުޅިގެން 37 ލެބޯޓަރީއެއް ހިމެނޭ ގޮތަށް އިންޑިއާ ސަރުކާރުން ގާއިމްކުރި "އިންސާކޮގް" އިންނެވެ.
އިންޑިއާ އިން އޮމިކްރޯން ވޭރިއެންޓް ފެނުމާ އެކު ކަރްނާޓަކާ ސަރުކާރުން ރައްޔިތުންގެ ކިބައިން އެދިފައި ވަނީ ހާސްނުވުމަށާއި ރައްކާތެރިވުމުގެ ގޮތުން މީހުން ގިނަ ތަންތަނަށް ގޮސް ނުހެދުމަށެވެ.
އެ ވޭރިއެންޓު ފެނުނު ދެ މީހުންނާ ގުޅުން ހުރި ކޮންޓެކްޓުތައް ޓްރޭސް ކުރުމުގެ މަސައްކަތް ވެސް މިހާރު ވަނީ ނިންމާލާފަ އެވެ.
ކަރްނާޓަކާ ސަރުކާރުން ބުނީ އޮމިކްރޯންއާ ގުޅިގެން މިހާތަނަށް ދުނިޔޭގެ އެއްވެސް ތަނަކުން މަރެއް އަދި ސީރިއަސް ކޭސްއެއް ވެސް ފެނިފައި ނުވާ ކަމަށެވެ. މިހާތަނަށް ދުނިޔޭގެ 29 ގައުމަކުން އޮމިކްރޯންއާ ގުޅުން ހުރި 373 ކޭސް ވަނީ ފެނިފަ އެވެ.
