މިލާން (ނޮވެމްބަރު 15) - އެމެރިކާގެ މަހުޖަނުންގެ ގްރޫޕެއް އަޑީގައި ތިބެ ދާދި ފަހުން ގަތް އިޓަލީގެ ކްލަބް، ޖެނޯއާ ކުރިއަށް ގެންދިއުމުގެ ޒިންމާ ކުރީގެ މަޝްހޫރު ފޯވާޑް އަދި މިހާރު ކޯޗިންގައި ކުރިއެރުން ހޯދަމުން އަންނަ އަންދްރޭ ޝެވްޗެންކޯއާ ހަވާލުކޮށްފި އެވެ.
މި މަހު ހަ ވަނަ ދުވަހު ޝެވްޗެންކޯ އަކީ ޖެނޯއާ ކޯޗުކަމަށް އިއުލާނުކުރި ނަމަވެސް ރަަސްމީ ހައިސިއްޔަތުން ފުރިހަމަ ކުރަން ޖެހޭ ހުރިހާ ކަމެއް ނިމުނީ މީގެ ދެ ދުވަހެއް ކުރިންނެވެ. އެއީ މި ފަހަރުގެ ޔޫރޯ ފުޓްބޯޅަ މުބާރާތަށް ފަހު ޔޫކްރެއިންގެ ގައުމީ ޓީމުގެ ކޯޗުކަން ދޫކޮށްލިއިރު، ޝެވްޗެންކޯ އާއި ޔޫކްރެއިން ފެޑެރޭޝަނާ ދެމެދު އޮތް އެއްބަސްވުމެއްގެ ދަށުން މި އަހަރުގެ ނިޔަލަށް ޝެވްޗެންކޯ އަށް އެހެން ޓީމަކާ ހަވާލުނުވެވޭ ގޮތަށް އޮތް މާއްދާގައި ހުރި ކަންތައްތަކަށް ހައްލެއް ހޯދުމަށެވެ.
ދާދި ފަހުން ޖެނޯއާގެ މެޖޯރިޓީ ހިއްސާ ގަތީ އެމެރިކާގެ އިންވެސްޓްމަންޓް ކުންފުނި 777 ޕާޓްނާސް އިންނެވެ. އެއީ އެމެރިކާގެ މަހުޖަނުންގެ ބޮޑު ގްރޫޕުން ހިންގާ ކުންފުންޏަކަށް ވީހިނދު އެ މީހުންގެ ވިސްނުމަކީ ކައިރި މުސްތަގުބަލެއްގައި އިޓަލީ ފުޓްބޯޅައިގައި ވަރުގަދަ ބާރަކަށް ޖެނޯއާ ހެދުމެވެ.
އެ ގޮތުން ޖެނޯއާ ކޯޗަކަށް ހުރި ޑާވިޑޭ ބަލަޑީނީ ވަކިކޮށް ޝެވްޗެންކޯ ކޯޗަކަށް ގެނައީ އިޓަލީ ފުޓްބޯޅައިގެ ކުޅުމުގެ ތަޖުރިބާ އާއި ކޯޗިންގައި ޝެވްޗެންކޯ ކޮށްފައިވާ މަސައްކަތަށް ބެލުމަށް ފަހު އެވެ.
ކޯޗިންގައި ޝެވްޗެންކޯ ވަނީ ޔޫކްރެއިން ގައުމީ ޓީމުގެ އެސިސްޓަންޓް ކޯޗުގެ މަގާމާއި ހެޑް ކޯޗުގެ މަގާމު ފުރައިފަ އެެވެ. ޖެނޯއާ އަކީ ޝެވްޗެންކޯ ކޯޗިންގައި ފެންނާނެ ފުރަތަމަ ކްލަބެވެ.
އިޓާލިއަން ލީގުގެ މި ވަގުތު ތާވަލަށް ބަލާއިރު ޖެނޯއާ އޮތީ ރެލިގޭޝަނާ ގާތުގަ އެވެ. ކުޅުނު 12 މެޗުން ލިބުނު ނުވަ ޕޮއިންޓާ އެކު އެ ޓީމު އޮތީ ލީގުގެ 17 ވަނައިގަ އެވެ.
ދެ އަހަރުގެ ކޮންޓްރެކްޓެއްގައި ޖެނޯއާ ކޯޗުކަމާ ޝެވްޗެންކޯ ހަވާލުވިއިރު، އޭނާ އެ ޓީމު ގޮވައިގެން ފުރަތަމަ މެޗުގައި އަންނަ އާދިއްތަ ދުވަހު ބައްދަލުކުރާނީ ހޯސޭ މޮރީނިއޯ ކޯޗުކޮށްދޭ ރޯމާއާ ދެކޮޅަށެވެ. މޮރީނިއޯ ވަނީ ޗެލްސީގައި ޝެވްޗެންކޯ އަށް ކޯޗުކޮށްދީފަ އެވެ.
