އަތޮޅު ތެރޭގައި ހުންނަ ސިއްހީ ހިދުމަތްދޭ ތަންތަނުގައި ބޭނުން ކުރުމަށް ހެލްތު މިނިސްޓްރީން ހޯދި އެމްބިއުލާންސްތައް ރަށްރަށަށް ފޮނުވަން ފަށައިފި އެވެ.
މިދިޔަ ޖޫން މަހު ސަރުކާރުން ވަނީ އަތޮޅުތަކަށް ބޭނުންވާ 96 އެމްބިއުލާންސް ގެނައުމަށް އެސްޓީއޯއާ ހަވާލުކޮށްފަ އެވެ.
މީގެ ހަފްތާއެއްހާ ދުވަސް ކުރިން ހެލްތު މިނިސްޓްރީން ވަނީ 20 އެމްބިއުލާންސް އެކި ރަށްރަށަށް ފޮނުވުމުގެ މަސައްކަތް ތިން ދުވަސް ތެރޭ ފަށާނެ ކަމަށް ބުނެފަ އެވެ. ހެލްތުން މިއަދު ވަނީ ރަސްމީކޮށް އެ މަސައްކަތް ފަށައިފަ އެވެ.
އެމްބިއުލާންސް ފޮނުވާ ރަށްތަކަކީ:
- ހއ. އުލިގަން
- ހއ. ފިއްލަދޫ
- ހދ. މަކުނުދޫ
- ހދ. ނޮޅިވަރަމް
- ށ. ފޯކައިދޫ
- ނ. މިލަދޫ
- ނ. ހެނބަަދޫ
- ރ. އިނގުރައިދޫ
- ޅ. ކުރެންދޫ
- ބ. ތުޅާދޫ
- ކ. ހުރާ
- އދ. ދަނގެތި
- ފ. ބިލެއްދޫ
- ތ. މަޑިފުށި
- ލ. މާމެންދޫ
- ގއ. ގެމަނަފުށި
- ށ. މަރޮށި
- ތ. ގާދިއްފުށި
- ބ. ކުޑަރިކިލު
- އއ. ތޮއްޑޫ
އެމްބިއުލާންސް ކަނޑުމަގުން މިއަދު ރަށްރަށަށް ފޮނުވަން ފެށިއިރު އެ މަސައްކަތް ނިމޭނެ ތާރީހެއް ހެލްތުން އަދި ހާމައެއް ނުކުރެ އެވެ.
އެމްބިއުލާންސްގެ ދަތިކަމަކީ މުޅި ރާއްޖެއަށް ވެސް ކުރިމަތިވެފައިވާ މައްސަލައެކެވެ.
ބައެއް ރަށްރަށުގައި އެމްބިއުލާންސް ނެތިގެން ރަށު ޕިކަޕާއި ގާޑިޔާ އަދި ބަރޯގައި ވެސް ބަލި މީހުން އުފުލަން ޖެހިފައިވާ މައްސަލަތަކެއް މިފަހުން ވަނީ ފެންމަތިވެފަ އެވެ.
މި ފަހުން އެމްބިއުލާންސްގެ މައްސަލަތަކެއް ދިމާވެ މާލޭގައި ވެސް ހާދިސާތަކެއް ހިނގާފައިވެ އެވެ.
