އަންނަ މަހު މާލޭގައި ފަށަން ނިންމާފައިވާ ސާފް ޗެމްޕިއަންޝިޕްގައި ޕާކިސްތާނަށް ފުރުސަތެއް އޮތްތޯ ދެކެވޭ ވާހަކަތަކާ ބެހޭގޮތުން ސައުތު އޭޝިއަން ފުޓްބޯޅަ ފެޑެރޭޝަން (ސާފް)ގެ ރައީސް ބަންގްލަދޭޝްގެ ކާޒީ ސަލާހުއްދީން އުއްމީދީ ޖަވާބެއް ދެެއްވައިފި އެވެ.
ތިން ވަނަ ފަރާތެއްގެ ނުފޫޒާ ހެދި ފީފާއިން ހަތަރު އަހަރު ތެރޭ ދެ ވަނަ ފަހަރަށް ޕާކިސްތާންގެ ފުޓްބޯޅަ ފެޑެރޭޝަން (ޕީއެފްއެފް) ސަސްޕެންޑްކުރަން ނިންމީ މިދިޔަ އޭޕްރީލް މަހު އެވެ. އޭގެ ކުރިން ޕާކިސްތާނުން އޮތީ މި ފަހަރުގެ ސާފް ޗެމްޕިއަންޝިޕްގައި ބައިވެރިވާން ނިންމައިފަ އެވެ. އެކަމަކު، ފަހުން ފީފާގެ ސަސްޕެންޝަނެއް އަތުވުމުން މުބާރާތުގައި ވާދަކުރުމުގެ ދޮރު އެއްކޮށް ބަންދުވީ އެވެ.
ސާފްގެ ރައީސްގެ މަގާމުގެ އިތުރުން ބަންގްލަދޭޝްގެ ފުޓްބޯޅަ ފެޑެެރޭޝަން (ބީއެފްއެފް)ގެ ރައީސްގެ ޒިންމާ ވެސް ނަންގަވަމުން އަންނަ ސަލާހުއްދީން، ބަންގްލަދޭޝްގެ މީޑިއާ އަަކަށް ވިދާޅުވީ ފީފާގެ ސަސްޕެންޝަން އުވާލައިފިނަމަ ސާފް ޗެމްޕިއަންޝިޕުން ޕާކިސްތާނަށް ފުރުސަތު ދޭން އޭނާގެ އެއްވެސް އިއުތިރާޒެއް ނެތް ކަމަށެވެ.
ޕާކިސްތާނުން އެންމެ ފަހުން ރަސްމީ މެޗެއް ކުޅުނީ 2019 ވަަނަ އަހަރު އެވެ. އެއީ ވޯލްޑް ކަޕް ކޮލިފައިންގައި ކެމްބޯޑިއާއާ ދެކޮޅަށް ކުޅުނު މެޗުގަ އެވެ.
ޕާކިސްތާން ސަސްޕެންޑްކުރީ ފީފާއިން ހަމަޖައްސާފައިވާ ޕީއެފްއެފްގެ ނޯމަލައިޒިން ކޮމިޓީ އަތުން އެ ގައުމުގެ ފުޓްބޯޅައިގެ ކޮންޓްރޯލް ޕީއެފްއެފްގެ ކުރީގެ ރައީސް ސައީދު އަޝްފާގު ހުސެއިން ޝާހް ނެގުމުންނެވެ. އޭނާ އެކަން ކުރީ ގަދަބާރުން ޕީއެފްއެފް ހެޑްކުއާޓަރުގެ ތެރެއަށް ގްރޫޕަކާ އެކު ވަދެ ކަމަށް ފީފާ އިން ހަމަޖެއްްސި ނޯމަލައިޒިން ކޮމިޓީގެ ޗެއާމަން މާލިކް ހާރޫން ވަނީ ޕާކިސްތާންގެ މީޑިއާ އަށް ދިން އިންޓަވިއުއެއްގައި އޭރު ވިދާޅުވެފަ އެވެ. އޭނާ ފީފާއަށް ހުށަހެޅި ރިޕޯޓްގައި ވެސް ބަޔާންކޮށްފައިވަނީ އެ ގޮތަށެެވެ.
ޕާކިސްތާންގެ އިތުރުން މި ފަހަރުގެ ސާފް ޗެމްޕިއަންޝިޕްގައި ބޫޓާނަށް ވެސް ވާދަކުރެވެން ނެތުމުން ސާފުން ނިންމާފައިވަނީ ފަސް ގައުމުގެ މެދުގައި މުބާރާތް ކުރިއަށް ގެންދާށެެވެ. ބޫޓާނަށް ވާދަނުކުރެވެނީ ކޮވިޑާ ހެދި އެ ގައުމުގެ ސަރުކާރުން ދަތުރުފަތުރު ކުރުމުގެ ހުއްދަ ނުދޭތީ އެވެ.
އަންނަ މަހު 1-16 އަށް މާލޭގައި ބާއްވާ ސާފް ޗެމްޕިއަންޝިޕަށް މަހަކަށް ވުރެ ކުޑަ ދުވަސްކޮޅަކަށް ވެފައިވާއިރު، މީގެ ހަފްތާއެއްހާ ދުވަސް ކުރިން ވަނީ މުބާރާތުގެ ޝެޑިއުލް ނެރެފަ އެވެ. އެއީ ފަސް ޓީމުގެ މެދުގައި ލީގު ބުރެއް ކުޅެފައި އެންމެ ގިނަ ޕޮއިންޓް ހޯދާ ދެ ޓީމެއް ފައިނަލް ކުޅޭ ގޮތަށެވެ. އެ ފޯމެޓާ މެދު ގައުމީ ޓީމުތަކުގެ ކޯޗުން މިހާރު ވަނީ ހިޔާލުފާޅުކޮށް އެ ރަނގަޅު ކަމަށް ވެސް ބުނެފަ އެވެ.
ސާފްގެ ސެކްރެޓަރީ ޖެނެރަލް އަންވަރުލް ހައްގު ވިދާޅުވީ އަލުން ޕާކިސްތާން މުބާރާތަށް ލުން ވެގެންދާނީ ދެން ވަރަށް އުނދަގޫ ކަމަކަށް ކަމަށެެވެ. އެންމެ ބޮޑު ސަބަބަކީ ޓީމުތަކުގެ ތައްޔާރީތަކަށް ފުރުސަތު ދޭން ފައިނަލް ޝެޑިއުލެއް ވެސް އާންމުކޮށްފައިވާތީ އެވެ. އަދި ދެން އަނެއްކާ ވެސް ބޮޑު ބަދަލެއް ޝެޑިއުލަށް ގެންނަންވެއްޖެނަމަ މީގެ ގެއްލުންތަކެއް ހުރިހާ ފަރާތަކަށް ވެސް އެބައޮތް ކަމަށް އޭނާ ވިދާޅުވެފައިވެ އެވެ.
