ރާމޯސް އާއި އިބްރަހިމޮވިޗް ނެތް، ސްޕެއިނާއި ސްވިޑެންގެ ކުރިމަތިލުން މިރޭ

Jun 14, 2021, 7:52 AM
އިބްރަހިމޮވިޗާއި ރާމޯސް: މި ފަހަރުގެ ޔޫރޯގައި ނުފެންނާނެ.

އިބްރަހިމޮވިޗާއި ރާމޯސް: މި ފަހަރުގެ ޔޫރޯގައި ނުފެންނާނެ.

މި ފަހަރުގެ ޔޫރޯ ސްކޮޑުގައި ސްޕެއިނުގެ ޑިފެންޑަރު ސާޖިއޯ ރާމޯސް އާއި ސްވިޑެންގެ ފޯވާޑް ޒްލަޓާން އިބްރަހިމޮވިޗް ހިމެނުނު ނަމަ މިއީ މި ދެ ކުޅުންތެރިންގެ ފަހު ޔޫރޯ އަށް ވުމުގެ ހުރިހާ ފުރުސަތެއް އެބައޮތެވެ. ސްޕެއިނާ އެކު ދެ ފަހަރު ޔޫރޯގެ ތަށި އުފުލާލި ރާމޯސް އަށް ސްކޮޑުން ޖާގަ ނުދިނީ އަނިޔާގެ މައްސަލަތަކާ ހުރެ ކަމަށް ސްޕެއިން ކޯޗު ލުއިސް އެންރީކޭ ވަނީ ބުނެފަ އެވެ. ރިޓަޔާމެންޓް އުވާލުމަށް ފަހު ޒްލަޓާން އިބްރަހިމޮވިޗް، ސްވިޑެން ގައުމީ ޓީމަށް ފަސް އަހަރު ފަހުން އެނބުރި އައިސް މިދިޔަ މާޗް މަހު ވަނީ މެޗެއް ކުޅެފަ އެވެ. ޔޫރޯގައި އޭނާ ކުޅޭނެ ކަމަށް ބެލެވުނު ނަމަވެސް މިދިޔަ މަހު ކަކުލަށް އަނިޔާވެގެން ފުރުސަތު ގެއްލުނީ އެވެ.

އުމުރުން 35 އަހަރުގެ ރާމޯސް ޓީމަށް ނުނަގަން ނިންމި ނިންމުމަަކީ ސްޕެއިނުގެ މީޑިއާ އާއި ސަޕޯޓަރުންގެ ފާޑުކިޔުން އެންރީކޭ އަށް އަމާޒުވި ސަބަބެކެވެ. އަދި ރާމޯސްގެ އިތުރުން ރެއާލް މެޑްރިޑްގެ އެއްވެސް ކުޅުންތެރިއަކަށް ސްޕެއިން ސްކޮޑުން ފުރުސަތު ނެތް މައްސަލައިގައި ގިނަ ބަޔަކު އެކި ގޮތަށް ވާހަކަ ދެއްކި އެވެ. އެއީ އެންރީކޭ އަކީ ކުރިން ރެއާލްގެ ވާދަވެރި ބާސެލޯނާގެ ކޯޗަށްވާތީ އެވެ.

ސްޕެއިންގެ މެޗެއްގެ ތެރެއިން އެންރީކޭ.

މި ފަހަރު ޔޫރޯ ސްކޮޑުން ޖާގަ ގެއްލުމާ އެކު ޔޫރޯގައި ރާމޯސްގެ ކެރިއަރު ނިމުނީ ކަމަށް ބެލެވުމުގެ ޖާގަ އެބައޮތެވެ. އަދި އިބްރަހިމޮވިޗް 2016 ވަަނަ އަހަރުގެ ޔޫރޯ އަށް ފަހު ރިޓަޔާކުރިއިރު، އޭނާ އަލުން އެނބުރި އައިސް މި ފަހަރުގެ ޔޫރޯ ކުޅުމަށް ފަހު އަނެއްކާ ގައުމީ ޓީމުން ރިޓަޔާކުރާނެ ކަމަށް ވާހަކަ އޮތީ ދެކެވިފަ އެވެ.

އެންމެ ފަހުން ސްޕެއިނާއި ސްވިޑެން ވާދަވެރި މެޗެއްގައި (މުބާރާތްތަކާއި ކޮލިފައިންގައި) ނުކުތް ފަސް މެޗުގެ ތެރެެއިން ތިން މެޗެއްގައި ރާމޯސް އާއި އިބްރަހިމޮވިޗް ވަނީ ކުޅެފަ އެވެ. އަދި މި ފަހަރުގެ މުބާރާތުގައި އެ ދެ ކުޅުންތެރިންގެ ކުޅެން ކުރި އުއްމީދުގެ ހުރަހަކަށްވީ ދިމާވި އަނިޔާގެ މައްސަލަތަކެވެ.

ސްވިޑެން އާއި ސްޕެއިން ޓީމަށް ކޮވިޑްގެ މައްސަލަ

މި ފަަަހަރުގެ ޔޫރޯ އަށް ސްޕެއިން ތައްޔާރުވާން ކުޑަ ދުވަސްކޮޅަކަށް ވެފައި ވަނިކޮށް އެ ޓީމަށް ދިމާވި އެންމެ ބޮޑު މައްސަލަ އަކީ ޓީމުގެ ކެޕްޓަން ސާޖިއޯ ބުސްކެޓްސް އާއި ޑިފެންޑަރު ޑިއޭގޯ ލޮރެންޓޭ ކޮވިޑަށް ޕޮޒިޓިވްވުމެވެ. މިރޭގެ މެޗުގައި ބުސްކެޓްސް އަށް ނުކުޅެވޭނެ އެވެ. އެކަމަކު އެންމެ ފަހުން ކުރި ކޮވިޑް ޓެސްޓްތަކުން ނެގެޓިވްވެފައިވާތީ ލޮރެންޓޭ އަށް މިރޭގެ މެޗުގެ ސްކޮޑުގައި ބައިވެރިވެވޭނެ އެވެ.

އެންރީކޭ އަށް ދެން އޮތް ބޮލުގެ ރިހުމަކީ މުބާރާތުގެ ފުރަަތަމަ މެޗާ ގާތްވެފައި އޮއްވައި ސްޕެއިން ކުޅުންތެރިން ކޮވިޑް ވެކްސިން ޖަަހަން ޖެހުމެވެ. މިދިޔަ ހުކުރު ދުވަހު ސްޕެއިން ކުޅުންތެރިން ވަނީ އެ ގައުމުގެ އޮލިމްޕިކްސް އެތުލިޓުންނާ އެކު ފައިޒާ ވެކްސިންގެ ފުރަތަމަ ޑޯޒް ޖަހައިފަ އެެވެ.

އެންރީކޭ ބޭނުންވީ މީގެ އެއް މަސް ކުރިން ސްޕެއިން ބޮޑު ސްކޮޑުގައި ހިމެނޭ ހުރިހާ ކުުޅުންތެރިން ވެކްސިންގެ ކަންތައް ފުރިހަމަކޮށްފައި ބެހެއްޓުމަށެވެ. އެކަމަކު ހާލަތު ބަދަލުވަމުންދިޔަ ގޮތުން އެކަން ނުކުރެވުނެވެ.

ފުރަތަމަ މެޗުގައި ސްޕެއިން މިރޭ ސްވިޑަންއާ ދެކޮޅަށް ނުކުންނައިރު، އެ ޓީމަކީ މި ފަހަރުގެ ޔޫރޯގައި ވާދަކުރާ ސްކޮޑުތަކުގެ ތެރެއިން އެވްރެޖްކޮށް ބަލާއިރު އެންމެ ޒުވާން ސްކޮޑެވެ. ސްޕެއިން ޓީމުގައި ލީޑަރުން ނެތް ކަމަށް ބުނާ ވާހަކަ އަށް އެންރީކޭ ވަނީ ޖަވާބުދީފަ އެވެ.

"ލީޑަޝިޕްގެ މައްސަލައެއް ޓީމަކު ނެތް. ޓީމުގައި ހުރި ކޮންމެ ކުޅުންތެރިއަކީ ވެސް އަހަރެން ބޭނުންވާ ޕްލޭނާ އެއްގޮތަށް ކުޅެވޭނެ ކުޅުންތެރިން،" ސްވިޑެންއާ ދެކޮޅަށް މިރޭ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އެންރީކޭ ބުންޏެވެ.

އިބްރަހިމޮވިޗް ނެތްއިރު، ކޮވިޑް-19 އަށް ޕޮޒިޓިވްވެފައިވާތީ ސްވިޑެންގެ އެންމެ މުހިއްމު އެއް ކުޅުންތެރިޔާ ޑޭޖާން ކުސުލެވްސްކީ އާއި މަޓިއަސް ސްވެންބާގަށް ސްޕެއިނާ ދެކޮޅަށް ނުކުޅެވޭނެ އެވެ. އެންރީކޭ ބުނީ ޔުވެންޓަސްގެ ތަރި ކުސުލެވްސްކީ އާއި ސްވެންބާގް ނުލައި ވެސް ސްވިޑެން އަކީ ރަނގަޅަށް ކުޅޭނެ ޓީމެއް ކަމަށެވެ.

"ސްވިޑެން އަކީ ޑައިރެކްްޓްކޮށް ކުޅޭ ވަރުގަދަ ޓީމެއް. އެ ޓީމު ވަރަށް ފިޒިކަލީ ވަރުގަދަ،" އެންރީކޭ ބުންޏެވެ.

އަހަރެމެން ފޯކަސް ކުރާނީ އަހަރެެމެންގެ ވަރުގަދަކޮށް ހުރި ކަންކަމަށް. ފުރަތަމަ މެޗު ވަރަށް މުހިއްމު. އެއީ ފުރަތަމަ މެޗުން މި އެޅެނީ މުބާރާތުގައި ކުރިއަށްދާން ބިންގަލެއް. ފުރަތަމަ މެޗު ވީމަ ބައިވަރެއް ގޮތްގޮތުން އުނދަގޫތަކެއް ވެސް ހުންނާނެ. އަހަރެން މި ހުރީ އެންމެ މޮޅު ކުޅުން ދެއްކޭނެ ކަމުގެ އުއްމީދު - އެންރީކޭ

އެންރީކޭ ބުނީ ސްޕެއިނުގެ ގޯލުގައި ކުޅޭނެ ވަކި ކުޅުންތެރިއެއް ނިންމާފައިނުވާނެ ކަމަށާއި އުނާއި ސިމޯން އާއި ޑޭވިޑް ޑެހެއާ އަދި ރޮބާޓް ސަންޗޭޒް ތެރެއިން ކޮންމެ ގޯލްކީޕަރަކަށް ވެސް ފުރުސަތު އެބައޮތް ކަމަށެވެ.

ބައިނަލްއަގުވާމީ މުބާރާތްތަކުގައި ސްވިޑެން އާއި ސްޕެއިން ވަނީ މީގެ ކުރިން ތިން ފަހަރެއްގެ މަތިން ކުޅެފަ އެވެ. އެންމެ ފަހުން ދެ މެޗުން މޮޅުވީ ސްޕެއިން އެވެ. ސްވިޑެން މޮޅުވީ 1950 ވަނަ އަހަރުގެ ވޯލްޑް ކަޕްގަ އެވެ.

ސްވިޑެންގެ މެޗެއްގެ ތެރެއިން އެންޑަސަން އުފާފާޅުކުރަނީ.

ސްވިޑެންގެ ކޯޗު ޔޭން އެންޑަަސަން ބުނީ އެންމެ ފަހުން ސްވިޑެން އިން ކުޅުނު މެޗުތަކަށް ބަލާއިރު، އެ ޓީމަށް ސްޕެއިން ކައިރީގައި ރަނގަޅު ކުޅުމެއް ދެއްކޭނެ ކަމަށެވެ. އޭނާ ބުނީ އެންމެ ފަހު ވަގުތާ ހަމައަށް ވެސް ތައްޔާރީތަކުގައި ފޯކަސް ކުރަން ޖެހޭ ކަންތައްތައް ސްވިޑެން ކުޅުންތެރިންނަށް ބުނެދެމުން އަންނަ ކަމަށެވެ.

"އަހަރެމެންގެ އެބައޮތް ޓެކްޓިކަލް ޕްލޭނެއް ސްޕެއިނާ ދެކޮޅަށް ކުޅެން. އެ ރަނގަޅަށް ގޮސްފިނަމަ އަހަރެމެންނަށް ނަތީޖާ ނެރެވޭނެ،" އެންޑަސަން ބުންޏެވެ.

ސްވިޑެން އެންމެ ފަހުން ޔޫރޯގެ މެޗަކުން މޮޅުވީ 2012 ވަނަ އަހަރު އެވެ. އެއީ ފްރާންސް އަތުން އެ ފަހަރުގެ މުބާރާތުގެ ގްރޫޕް ސްޓޭޖުގެ ފަހު މެޗުންނެވެ. އެ މެޗުގައި ސްވިޑެން އަށް ފުރަތަމަ ގޯލު ޖަހައިދިނީ އިބްރަހިމޮވިޗް އެވެ.

ސްވިޑެން އެންމެ ފަހުން ޔޫރޯ ފުޓްބޯޅަ މުބާރާތެއްގެ ގްރޫޕް ސްޓޭޖު ފަހަަނައަޅައި ދިޔައީ 2004 ވަނަ އަހަރު ޕޯޗުގަލްގައި ބޭއްވި މުބާރާތުގަ އެވެ. އެ ފަަހަރު އެ ޓީމު ކެޓީ ކުއާޓާ ފައިނަލްގައި ޕެނަލްޓީ ޖަހައިގެން ނެދަލެންޑްސް އަތުންނެވެ.

ސްޕެއިނުގެ ސެވިއްޔާގެ ލަ ކަރްޓޫހާ ސްޓޭޑިއަމްގައި މިރޭ ސްވިޑެންއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox