ޔޫރަޕްގެ ވަރުގަދަ ބާރެއްގެ ގޮތުގައި އިންގްލެންޑް އޮތް ނަމަވެސް މިހާތަނަށް އެ ޓީމަށް ޔޫރޯގެ ތަށީގައި އަތްލުމުގެ ނަސީބެއް ލިބިފައިނުވެ އެވެ. އެ ޓީމުން މިހާތަނަށް ހޯދި އެންމެ ބޮޑު ކާމިޔާބަކީ 1968 ވަނަ އަހަރުގެ މުބާރާތުގެ ތިން ވަނަ ހޯދުމެވެ. މިއީ އިންގްލެޑުން ޔޫރޯގައި ވާދަކުރާ 10 ވަނަ ފަހަރެވެ . އެންމެ ފަހުން ކުޅުނު ހަތް ޔޫރޯގެ ތެރެއިން އިންގްލެންޑް ކޮލިފައިނުވީ 2008 ވަނަ އަހަރު އޮސްޓްރިއާ އާއި ސްވިޒަލެންޑްގައި މުބާރާތް ބޭއްވިއިރު އެވެ. މި ފަހަރުގެ ޔޫރޯ އަށް އިންގްލެންޑް ކޮލިފައިވީ ގްރޫޕް އޭގެ އެއް ވަނަ ޓީމުގެ ގޮތުގަ އެވެ. އަށް މެޗު ކޮލިފައިންގައި ކުޅުނުއިރު، އިންްގްލެންޑުން ވަނީ އޭގެ ތެރެއިން ހަތް މެޗުން މޮޅުވެފަ އެވެ. ބަލިވީ ރަށުންބޭރުގައި ޗެކް ރިޕަބްލިކާ ދެކޮޅަށް ކުޅުނު މެޗުންނެވެ. މީގެ ހަތަރު އަހަރު ކުރިން 2016 ވަނަ އަހަރު ފްރާންސްގައި ބޭއްވި ޔޫރޯގައި އިންގްލެންޑް ކެޓީ ދެ ވަނަ ބުރުގައި އައިސްލެންޑް އަތުން 2-1 އިން ބަލިވެގެންނެވެ. މިއީ އިންގްލެންޑަށް ކުރިމަތިވި ލަދުވެތި ނަތީޖާ އެކެވެ.
މި ފަހަރުގެ ޔޫރޯގައި އިންގްލެންޑްގެ ގްރޫޕް ސްޓޭޖު ތިން މެޗުން ވެސް އޮތީ އަމިއްލަ ގައުމުގަ އެވެ. އަދި މުބާރާތުގެ ފަހު މެޗުތައް ވެސް ލަންޑަނުގައި ކުޅޭ ގޮތަށް އޮތުމުންމިއީ 1996 ވަނަ އަހަރުގެ ނާކާމިޔާބީ އަށް ފަހު އިންގްލެންޑަށް ޔޫރޯ ކާމިޔާބުކުރަން ލިބޭ ބޮޑު ފުރުސަތެއްގެ ގޮތުގައި އެ ގައުމުގެ ފުޓްބޯޅަ ތަޖުރިބާކާރުން ދެކެ އެވެ. އަދި އެންމެ ފަހުން ބޭއްވި ވޯލްްޑް ކަޕްގެ ހަތަރު ވަނަ އަށް ދިޔަ އިންގްލެންޑަށް މި ފަހަރު އެއް ހަރުފަތް މައްޗަށް ޖައްސާލެވޭނެ ކަމަށް ގިނަ ބަޔަކު ގަބޫލުކުރެ އެވެ.
އިންގްލެންޑްގެ އެންމެ ނުރައްކާތެރި ކުޅުންތެރިޔަކީ ކޮލިފައިންގައި 12 ގޯލު ޖެހި ފޯވާޑް ހެރީ ކޭން އެވެ. ކޭން މި ވަގުތު ހުރީ ތަފާތު ފޯމެއްގަ އެވެ. މި ފަހަރުގެ އިނގިރޭސި ޕްރިމިއާ ލީގުގެ ރަން ބޫޓު ހާސިލްކުރީ ވެސް ކޭން އެވެ. ކޭންގެ އިތުރުން ދެން އިންގްލެންޑް ޓީމުން ފާހަގަކޮށްލެވޭ ކުޅުންތެރިންނަކީ ޗެލްސީ އަށް ޗެމްޕިއަންސް ލީގު ކާމިޔާބު ކޮށްދޭން އެހީތެރިވި މޭސަން މައުންޓާއި އެސްޓަން ވިލާގެ ކެޕްޓަން ޖެކް ގްރީލިޝް، މެންޗެސްޓާ ސިޓީގެ ރަހީމް ސްޓާލިން އަދި ބޮރޫޝިއާ ޑޯޓްމަންޑްގެ ޖޭޑަން ސަންޗޯ އެވެ.
އިންގްލެންޑްގެ ކޯޗު ގަރެތު ސައުތުގޭޓް.
ކޯޗު: ގަރެތު ސައުތުގޭޓް
ބޮޑު ހަަތަރު މުބާރާތުގައި އިންގްލެންޑަށް ކުޅުނު ސައުތުގޭޓަށް އިންގްލެންޑްގައި ކޯޗެއްގެ ގޮތުގައި ކާމިޔާބެއް ހޯދިފައިނުވި ނަމަވެސް އެ ޓީމު ގޮވައިގެން ރަނގަޅު ނަތީޖާތަކެއް އަންނަނީ ނެރެމުންނެވެ. އެ ގޮތުން 2018 ވަނަ އަހަރުގެ ވޯލްޑް ކަޕްގައި އޭނާ ކުރި މަސައްކަތް އިނގިރޭސި ގިނަ ބަޔަކު ވަނީ ބަލައިގަނެފަ އެވެ.
ސްކޮޑު
ކީޕަރުން: ޑީން ހެންޑަސަން (މެންޗެސްޓާ ޔުނައިޓެޑް)، ސޭމް ޖޯން ސްޓޯން (ވެސްޓް ބްރޮމް)، ޖޯޑަން ޕިކްފޯޑް (އެވަޓަން)
ޑިފެންޑަރުން: ބެން ޗިލްވެލް (ޗެލްސީ)، ކޮނާ ކޯޑީ (ވުލްވްސް)، ރީސް ޖޭމްސް (ޗެލްސީ)، ހެރީ މެގުއާ (މެންޗެސްޓާ ޔުނައިޓެޑް)، ޓައިރަން މިންގްސް (އެސްޓަން ވިލާ)، ލޫކް ޝޯ (މެންޗެސްޓާ ޔުނައިޓެޑް)، ޖޯން ސްޓޯންސް (މެންޗެސްޓާ ސިޓީ)، ކިއެރަން ޓްރިޕިއޭ (އެތުލެޓިކޯ މެޑްރިޑް)، ކައިލް ވޯކާ (މެންޗެސްޓާ ސިޓީ)، ބެން ވައިޓް (ބްރައިޓަން)
މިޑްފީލްޑަރުން: ޖޫޑް ބެލިންހަމް (ބޮރޫޝިއާ ޑޯޓްމަންޑް)، ޖޯޑަން ހެންޑަސަން (ލިވަޕޫލް)، މޭސަން މައުންޓް (ޗެލްސީ)، ކަލްވިން ފިލިޕްސް (ލީޑްސް ޔުނައިޓެޑް)، ޑެކްލަން ރައިސް (ވެސްޓް ހޭމް)
ފޯވާޑުން: ޑޮމިނިކް ކަލްވެޓް-ލެވިން (އެވަޓަން)، ފިލް ފޯޑެން (މެންޗެސްޓާ ސިޓީ)، ޖެކް ގްރީލިޝް (އެސްޓަން ވިލާ)، ހެރީ ކޭން (ޓޮޓެންހަމް)، މާކަސް ރެޝްފޯޑް (މެންޗެސްޓާ ޔުނައިޓެޑް)، ބުކާޔޯ ސަކާ (އާސެނަލް)، ޖޭޑަން ސަންޗޯ (ބޮރޫޝިއާ ޑޯޓްމަންޑް)، ރަހީމް ސްޓާލިން (މެންޗެސްޓާ ސިޓީ)
