މީގެ ފަސް އަހަރު ކުރިން މުޅިން އަލަށް ޔޫރޯ ފުޓްބޯޅަ މުބާރާތުގައި ވާދަކޮށް ވޭލްސް އިން އެންމެން ހައިރާންކޮށްލި އެވެ. ސެމީ ފައިނަލުން ވޭލްސް ބަލިވީ މުބާރާތުގެ ޗެމްޕިއަންކަން ހޯދި ޕޯޗުގަލް އަތުން 2-0 އިންނެވެ. އެކަމަކު އަލަތު މުބާރާތުގައި އެ ޓީމުން ނެރުނު ނަތީޖާތަކަށް ބަލާއިރު، ގޯހެއް ނޫނެވެ. އެއީ އެ ޓީމުން މި ފަހަރުގެ ޔޫރޯ އަށް ނުކުންނައިރު ލިބޭނެ އެންމެ ބޮޑު ހިތްހަަމަ ޖެހުމެވެ
ވޭލްސް މި ފަހަރުގެ ޔޫރޯ އަށް ކޮލިފައިވީ ކްރޮއޭޝިއާގެ ފަހަތުން ކޮލިފައިން ގްރޫޕްގެ ރަނަރަޕްގެ ގޮތުގަ އެވެ. އެ ޓީމުން ކޮލިފައިންގައި ކުޅުނު އަށް މެޗުގެ ތެރެއިން ހަތަރު މެޗުން މޮޅުވިއިރު، ދެ މެޗުން ބަލިވެ ވަނީ ދެ މެޗުން އެއްވަވެފަ އެވެ. ވޭލްސްގެ ނަން ކިޔާއިރު، އެންމެ ގިނަ ބަޔެއްގެ ވިސްނުމަށް އެންމެ ފުރަތަމަ އަންނާނެ ނަމަކީ އެ ޓީމުގެ ތަރި ގެރެތު ބޭލް އެވެ. ކޮލިފައިންގައި ވޭލްސް އަށް އެންމެ ގިނަ ލަނޑު ޖަހައިދިން ތިން ކުޅުންތެރިންގެ ތެރޭގައި ބޭލް ހިމެނެ އެވެ. ބޭލް އާއި އާރޮން ރަމްސޭ އަދި ކެއިފާ މޫރް ވަނީ ކޮންމެ ކުޅުންތެރިއަކު ދެ ގޯލު ޖަހައިފަ އެވެ
ވޭލްސް އިން މި ފަަހަރުގެ ޔޫރޯ އަށް ނުުކުންނައިރު އެ ޓީމު އޮތް ގްރޫޕްގެ ގޮތުން މުބާރާތުގައި ކުރިއަށްދާން ޗެލެންޖްތަކެއް ހުރި ކަމުގައި ވިޔަސް އެ ޓީމުގައި ތިބި ކުޅުންތެރިންގެ ފެންވަރަށް ބަލާއިރު، މިއީ ވޭލްސް އަށް ނުވާވަރުގެ ކަމެއް ނޫނެވެ. ވޭލްސް ޓީމުގެ މެޖޯރިޓީ ކުޅުންތެރިން ކުޅެނީ އިނގިރޭސި ޕްރިމިއާ ލީގުގަ އެވެ. ބައެއް ކުޅުންތެރިން ސްޕެނިޝް ލީގާއި އިޓާލިއަން ލީގުގައި ވެސް ކުޅެ އެވެ. އެހެންކަމުން ވޭލްސް އަކީ މި ފަހަރު ޔޫރޯގައި ހައިރާންކުރަނިވި ނަތީޖާތަކެއް ނެރެވޭ ފަދަ ކުޅުންތެރިން ތިބި ޓީމެކެވެ.
ޕޭޖް އާއި ގިގްސް ވޭލްސްގެ ފަރިތަކުރުމެއްގެ ތެރެއިން.
ކޯޗު: ރޮބާޓް ޕޭޖް
ހުރިހާ ކަމެއް ރަނގަޅަށް ދިޔަނަމަ ވޭލްސްގެ ކޯޗަކަށް ހުންނާނީ ކުރީގެ މަޝްހޫރު ކުޅުންތެރިޔާ ރަޔާން ގިގްސް އެވެ. އެކަމަކު ގެވެށި އަނިޔާގެ މައްސަލައެއްގައި ދައުވާކުރަން ނިންމާފައިވާތީ މިދިޔަ އަހަރު ފަހުކޮޅުން ފެށިގެން ވޭލްސްގެ ކޯޗުގެ ޒިންމާ އުފުލަމުން އަންނަނީ އެސިސްޓަންޓަކަށް ކުރިން މަސައްކަތްކުރި ރޮބާޓް ޕޭޖް އެވެ. ވޭލްސްގެ 21 އަހަރުން ދަށުގެ ޓީމުގައި ޕޭޖް ކޮށްފައިވާ ކޯޗިންގެ މަސައްކަތަށް ބަލާއިރު، ސީނިއާ ޓީމުގައި ތިބި ކުޅުންެތެރިން ގޮވައިގެން އޭނާ އަށް ރަނގަޅު ނަތީޖާތަކެއް ނެރެވިދާނެ އެވެ
ސްކޮޑު
ކީޕަރުން: ވޭން ހެނެއްސީ (ކްރިސްޓަލް ޕެލަސް)، ޑެނީ ވޯޑް (ލެސްޓާ ސިޓީ)، އެޑަމް ސްޓޯކްސް (ސްޓޯކް ސިޓީ)
ޑިފެންޑަރުން: ކްރިސް ގަންޓާ (ޗާލްޓަން އެތުލެޓިކް)، ބެން ޑޭވިސް (ޓޮޓެންހަމް)، ކޮނާ ރޮބާޓްސް (ސްވަންސީ ސިޓީ)، އީތަން އަމްޕަޑޫ (ޗެލްސީ)، ކްރިސް މެޕަމް (ބޯންމައުތު)، ޖޯ ރޮޑޯން (ޓޮޓެންހަމް)، ނީކޯ ވިލިއަމްސް (ލިވަޕޫލް)، ރީސް ނޮރިންޓަން—ޑޭވިސް (ޝެފީލްޑް ޔުނައިޓެޑް)، ބެން ކަަބަންގޯ (ސްވަންސީ ސިޓީ)، ޓޮމް ލޮކިޔާ (ލޫޓަން)
މިޑްފީލްޑަރުން: އާރޮން ރަމްސޭ (ޔުވެންޓަސް)، ޖޯ އެލަން (ސްޓޯކް ސިޓީ)، ޖޮނަތަން ވިލިއަމްސް (ކާޑިފް ސިޓީ)، ހެރީ ވިލްސަން (ލިވަޕޫލް)، ޑެނިއަލް ޖޭމްސް (މެންޗެސްޓާ ޔުނައިޓެޑް)، ޑޭވިޑް ބްރޫކްސް (ބޯންމައުތު) ޖޯ މޮރެލް (ލޫޓަން)، މެތިއު ސްމިތު (މެންޗެސްޓާ ސިޓީ)، ޑައިލަން ލެވިޓް (މެންޗެސްޓާ ޔުނައިޓެޑް)، ރުބިން ކޮލްވިލް (ކާޑިފް ސިޓީ)
ފޯވާޑުން: ގެރެތު ބޭލް (ރެއާލް މެޑްރިޑް)، ކެއިފާ މޫރް (ކާޑިފް ސިޓީ). ޓައިލާ ރޮބަޓްސް (ލީޑްސް ޔުނައިޓެޑް).
