މާލެ އާއި ހުޅުމާލެ މަގުމަތީގައި ގިނަވެފައިވާ ބުޅަލުގެ މައްސަލަ ހައްލު ކުރަން 3،000 ބުޅާ ގެންގުޅެވޭނެ ފެސިލިޓީއެއް ހުޅުމާލޭގައި ހެދުމަށް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
ބުޅާތައް އިންތިހާއަށް ގިނަވެ، ކުނި ކޮތަޅުތައް ހާވައި މަގުތައް ހަޑިކުރުން ފަދަ ކަންކަމާ ހެދި ގިނަ ބަޔަކު ދަނީ ޝަކުވާ ކުރަމުންނެވެ. ބުޅަލުގެ މައްސަލާގައި އެޗްޑީސީއަށް ހުޅުމާލޭގައި އުޅޭ ރައްޔިތުންގެ ފަރާތުން 2019 ގައި 50 ޝަކުވާ ހުށަހެޅިއިރު މިދިޔަ އަހަރު 117 ޝަކުވާއެއް ހުށަހެޅި އެވެ. އެހެންވެ ބުޅަލުގެ މައްސަލައަށް ދާއިމީ ހައްލެއް ގެނައުމަށް މިދިޔަ އަހަރުން ފެށިގެން އެޗްޑީސީން އަންނަނީ މަސައްކަތް ކުރަމުންނެވެ.
ބުޅަލަށް ހާއްސަ ފެސިލިޓީ މުވައްޒަފުންނާ އެކު ހެދުމަށް އެޗްޑީސީން ނިންމާފައިވަނީ ހުޅުމާލޭ ދެވަނަ ފިޔަވަހީގެ ބައެއް ކަމުގައިވާ ފަރުކޮޅުފުށީގެ 790 ސްކެއާ މީޓަރުގެ ބިމެއްގަ އެވެ. އެ ފެސިލިޓީ ހިންގުމަށް ނިންމާފައިވަނީ މާލޭ ސިޓީ ކައުންސިލާ ގުޅިގެންނެވެ.
ހުޅުމާލޭގެ މަގެއް މަތީ ދެ ބުޅާ: ވަގު ބުޅަލަށް ހާއްސަ ފެސިލިޓީއެއް ހުޅުމާލޭގައި ހަދަން ވަނީ ނިންމައިފައި-- ފޮޓޯ: ހުސައިން ޝަޔާހް/ އަދަދު
ބުޅަލުގެ މައްސަލަ ހައްލު ކުރުމަށް އެޗްޑީސީން ޕްލޭން ހަދާފައިވަނީ މެލޭޝިއާގެ ޓްރެޕް ނިއުޓާ ރިލީޒް މެނޭޖް (ޓީއެންއާރުއެމް) ގެ ކޮންސެޕްޓަށެވެ. އެގޮތުން ބުޅާތައް ފެސިލިޓީއަށް ގެންދިއުމަށް ފަހު ވެކްސިން ޖަހައި ފަރުވާ ދިނުމަށް ވަނީ ނިންމައިފަ އެވެ. އެއަށް ފަހު ބުޅާތައް އުޅޭތަނެއް އެނގޭނެ ޓްރެކިން ޑިވައިސްއެއް ކޮންމެ ބުޅަލެއްގައި ވެސް ހަރުކުރަން ވަނީ ނިންމައިފަ އެވެ.
ބުޅާތައް ގެންގުޅުމަށް ފަހު ޕެޓްގެ ގޮތުގައި ގެންގުޅުމަށް ބޭނުންވާ މީހުންނަށް ދިނުމަށް ޕްލޭންގައި ވަނީ ނިންމައިފަ އެވެ.
ސިޓީ ކައުންސިލުން ރޭ ބޭއްވި ނޫސްވެރިންގެ ބައްދަލުވުމުގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ އާއްމުންނަށް އުނދަގޫވާ ގޮތަށް އުޅޭ ބުޅަލުގެ މައްސަލަ ހައްލު ކުރުމަށް ކުރަން ޖެހޭ މަސައްކަތްތައް ކުރުމަށް ކައުންސިލުން ނިންމާފައިވާ ކަމަށެވެ. ނިމިދިޔަ ކައުންސިލުން ވެސް ބުޅަލުގެ މައްސަލަ ހައްލު ކުރުމަށް މަސައްކަތްތަކެއް ކޮށްފައި ހުރުމުން އެކަން ކުރާނީ އެޗްޑީސީއާ ގުޅިގެން ފެސިލިޓީއެއް ހަދައިގެން ކަމަށް މުއިއްޒު ވިދާޅުވި އެވެ.
ބުޅަލަށް ހާއްސަކޮށްގެން ހަދާ ފެސިލިޓީގެ މަސައްކަތްތައް ވަރަށް އަވަހަށް ފެށުމަށް އެޗްޑީސީ އާއި ސިޓީ ކައުންސިލުން ވަނީ ނިންމައިފަ އެވެ.
މާލެ އާއި ހުޅުމާލޭގައި ބުޅާ ގިނަވެފައިވާއިރު އެ އެއްޗެހި ކައި އުޅެނީ އުކާލަން ނެރެފައި ހުންނަ ކުނި ކޮތަޅުތައް ހާވައިގެންނެވެ. ބައެއް މީހުން ބުޅަކަށް ކާން ދިނުމަށް އެކި ސަރަހައްދުތަކަށް ގޮސް ވެސް އުޅެ އެވެ.
