މާފަންނުގައި ހުންނަ ބޮޑުގޭގެ އެއް ބައި ޕާކިން ޒޯނަކަށް ހަދަން ނިންމައި، އެ މަސައްކަތް ސިޓީ ކައުންސިލުން ފަށައިފި އެވެ.
ސިޓީ ކައުންސިލުން މައުލޫމާތު ދިން ގޮތުގައި، ޕާކިން ޒޯނު ހަދާނީ އެ ގޯތި ތެރޭގައި ހަދާފައިހުރި ވަގުތީ މިސްކިތަށް ދާ މީހުންނަށް ޕާކްކުރަން ފަސޭހަވާނެ ގޮތަށް ބޮޑުގޭގެ އުތުރު ފަރާތުގަ އެވެ.
އެގޮތުން، ޕާކިން ޒޯން ހަދަނީ ވަގުތީ މިސްކިތަށް އުތުރު ފަރާތުން ވަދެވޭ ގޮތަށް މަގެއް ކެނޑުމަށްފަހު ދެ ފަރާތުގައި ސައިކަލް ޕާކް ކުރެވޭ ގޮތަށެވެ.
އާ ސިޓީ ކައުންސިލުން ހަދަން ފެށި ފުރަތަމަ ޕާކިން ޒޯނުގެ މަސައްކަތް މިއަދު ފައްޓަވައިދެއްވީ މޭޔަރު ޑރ. މުހައްމަދު މުއިއްޒެވެ. މުއިއްޒު ވިދާޅުވި ގޮތުގައި، ބޮޑުގޭގައި ޕާކިން ޒޯނު ހެދުމުގެ މަސައްކަތް ފެށީ އެކަމަށް ގިނަ ބަޔަކު އެދެމުންދާތީ އެވެ.
މުއިއްޒު، މޭޔަރު ކަމާ ހަވާލުވެވަޑައިގަތުމަށްފަހު، ބިއްލޫރިޖެހިގޭގައި ކުރީ ސިޓީ ކައުންސިލުން ހަދަން ފެށި ޕާކިން ޒޯނު ނިންމައި، ވަނީ ހުޅުވާލާފަ އެވެ.
މުއިއްޒު ވިދާޅުވި ގޮތުގައި، ޕާކިންއަކީ ބޮޑު ދަތިކަމެއް އޮތް ކަމަކަށްވާއިރު ޕާކިން ޒޯނު ފަދަ ތަންތަން ހެދެން ހުރި ބިންތައް ހުޅުވާލައި އާންމުންނަށް ބޭނުން ހިފޭނެ އިންތިޒާމްތައް ހަމަޖައްސަމުންދާނެ ކަމަށެވެ. އެގޮތުން، ޕާކިން ޒޯނުގެ އިތުރުން ހިތްހަމަޖައްސާލަން ދާނެ މަންޒިލްތައް ވެސް އެފަދަ ތަންތަނުގައި ތަރައްގީ ކުރައްވާނެ ކަމަށް ވިދާޅުވި އެވެ.
ހައުސިން މިނިސްޓަރު ކަމަށް މުއިއްޒު ހުންނެވިއިރު ވެސް މާލޭގެ އެކި ސަރަހައްދުގައި ޕާކިން ޒޯނުތަކާއި ޕާކްތައް ތަރައްގީ ކުރެއްވި އެވެ. މުއިއްޒުގެ މޭޔަރު ކަމުގެ ވައުދުތަކުގެ ތެރޭގައި ވެސް އެފަދަ ތަންތަން އިތުރަށް ތަރައްގީ ކުރުމަށް ހިމަނާފައިވެ އެވެ.
