ކޮވިޑްގެ އެންމެ ގޯސް ހާލަތަށް ތައްޔާރުވުމަށް ރާއްޖެން ހޯދަން ހަވާލުކުރި ވެންޓިލޭޓަރު މައްސަލާގައި ކޮރަޕްޝަން ހިންގި ކަމުގެ ތުހުމަތުގައި މަސައްކަތުން އެކަހެރިކުރި، ހެލްތު މިނިސްޓްރީގެ ދެ ނައިބުން ކަމަށްވާ ޝިޔާމާ މުހައްމަދާއި ނިޝާމާ މުހައްމަދު މަގާމުން ވަކިކޮށްފި އެވެ.
ރައީސް އޮފީހުގެ ތަރުޖަމާނު މަބުރޫކު އަޒީޒު މިއަދު ވިދާޅުވި ގޮތުގައި އެ ދެ ބޭފުޅުން މަގާމުން ވަކިކޮށްފައިވަނީ މިއަދު އެވެ. އެ ދެ ބޭފުޅުން މަގާމުން ވަކިކޮށްފައިމިވަނީ މުސާރަ ލިބޭ ގޮތަށް ސަސްޕެންޝަން ތިބޭތާ އެތައް މަހެއްވީ ފަހުންނެވެ.
ނިޝާމާ އާއި ޝިޔާމާއަކީ ވެސް ޖުމްހޫރީ ޕާޓީއަށް ނިސްބަތްވާ ދެ ބޭފުޅުންނެވެ.
ވެންޓިލޭޓަރު މައްސަލާގައި ހެލްތު މިނިސްޓްރީގެ ބިޑް ކޮމިޓީއަށް ބޮޑެތި ތުހުމަތުތަކެއް ކުރެވޭއިރު، އެ ކޮމިޓީގެ ޗެއާއަކީ ނިޝާމާ އެވެ. ޝިޔާމާ ވެސް އެ ކޮމިޓީގައި ބައިވެރިވެވަޑައިގަންނަވަ އެވެ.
ނިޝާމާ ކުރިން ވިދާޅުވެފައިވާ ގޮތުގައި، ވެންޓިލޭޓަރު މައްސަލާގައި އޭނާ އަމަލު ކުރައްވާފައިވަނީ އަމާނަތްތެރިކަމާއެކު ތެދު ނިޔަތުގަ އެވެ. އޭނާ ވަނީ އެ މައްސަލާގައި ކަން ހިނގައިދިޔަ ގޮތް ތަފްސީލުކޮށް ތަހުގީގީ އިދާރާތަކަށް ހާމަ ކުރައްވާނެ ކަމަށް ވިދާޅުވެ، ގާނޫނީ ހިމާޔަތްތެރިކަން ދިނުމަށް އެދި ރައީސް އޮފީހުގައި ވެސް ދަންނަވާފަ އެވެ.
އޭގެފަހުން، އޭސީސީން ވަނީ ނިޝާމާގެ ބަޔާން ނަގާފަ އެވެ. އޭސީސީން ތަހުގީގުން ވެސް ބިޑް ކޮމިޓީގެ އިހުމާލު ފާހަގަ ކުރެވިފައިވާއިރު، މައްސަލާގައި ތުހުމަތު އޭސީސީން ކުރާ ބޭފުޅުންގެ ލިސްޓްގައި ނިޝާމާ އާއި ޝިޔާމާ ހިމެނެ އެވެ. ނަމަވެސް، މިހާތަނަށް އެ މައްސަލާގައި ދައުވާ ކުރުމާ ހަަމަށް ނުދެ އެވެ.
މީގެ އަހަރެއްހާ ދުވަސްކުރިން އެޕްރީލް، 2، 2020 ގައި ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ އެކު ހެލްތު މިނިސްޓްރީން ވެންޓިލޭޓަރު ހޯދަން އެއްބަސްވެފައިވީ ނަމަވެސް މިހާތަނަށް ރާއްޖެ ފޮނުވީ ޖުމްލަ 15 ވެންޓިލޭޓަރެވެ. އެތައް މުއާމަލާތްތަކަކަށް ފަހު ވެސް ބާކީ 60 ވެންޓިލޭޓަރު އެ ކުންފުނިން ނުފޮނުވި އެވެ.
ވެންޓިލޭޓަރު ހޯދަން އެގްޒެކިއުޓާސްއާ އެކު ހެލްތު މިނިސްޓްރީން އެއްބަސްވީ 34 މިލިއަން ރުފިޔާ އަށެވެ. މީގެތެރެއިން 30 މިލިއަން ރުފިޔާ އެ ކުންފުންޏަށް ބޭންކް ގެރެންޓީއަކާ ނުލައި އެޑްވާންސްގެ ގޮތުގައި ވަނީ ދޫކޮށްފަ އެވެ. މިއީ ގޯސްކޮށް ހިންގާފައިވާ މުއާމަލާތެއް ކަން އޮޑިޓް ރިޕޯޓުގައި ވަނިކޮށް އޭސީސީން މި މައްސަލަ ތަހުގީގުކޮށް ހިޔާނާތް ހިންގާފައިވާ ކަމުގެ ތުހުމަތުތަކާ އެކު ދައުވާ އުފުލައިދޭން ވެސް އެދުނެވެ. އެ ތަހުގީގުގައި ބައެއް ކަންކަން ފުރިހަމަކުރަން ޕީޖީ އޮފީހުން ވަނީ މައްސަލަ އަނބުރާ އޭސީސީއަށް ފޮނުވައިފަ އެވެ.
ދައުވާކޮށްދިނުމަށް އެދޭ ފަރާތްތަކުގެ ތެރޭގައި އޭރުގެ ހެލްތު މިނިސްޓަރު އަބްދުﷲ އަމީން ވެސް ހިމެނެ އެވެ. އަމީން އިސްތިއުފާ ދެއްވީ ވެންޓިލޭޓަރު މައްސަލާގައި އަމިއްލައަށް މަސައްކަތުން އެކެހެރިވެހުންނެވުމަށްފަހު އެވެ.
ސަރުކާރުން މިހާރު ވަނީ ކުންފުންޏާއެކު އޮތް އެއްބަސްވުން ބާތިލްކުރަން ނޯޓިސް ފޮނުވާފަ އެވެ.
