ހިތަށް އަރާ ކޮންމެ އެއްޗެއް އޭގެ ތެދުދޮގު ބަލާލުމަކާ ނުލައި މީހެއް ކައިރީ ބުނެވެނީ މަދެއްކޮށެއް ނޫނެވެ. އަދި މީހަކު ބުނާ އެއްޗެއްގައި އަނެކާއާމެދު ތުހުމަތެއް އުފައްދާފައި އޮތްނަމަ އެވާހަކައިގެ ހަބަރު އެހެން މީހުންނަށް ދިނުމަށް ފޯރިއާއެކު އަވަސްވެ ގަނެވެނީ ޖެހިލުމެއް ވެސް ނެތި އެވެ. ކިހާވަރެއްގެ ކަމެއްތޯ ފިކުރެއް ނެތި އެވެ. ތަރައްގީވެ ކުރިއަރާފައިވާ ސޯޝަލް މީޑިއާގެ ވަސީލަތާއެކު ހިތަށް އަރާ ކޮންމެ އެއްޗެއް ހިތަށް އަރާ ވަގުތު އަނެކާގެ ދުލާއި ކަންފަތާ ހަމަޔަށް ފޮނުވާލެވޭ މިޒަމާނުގައި މިކަމަކީ ވަރަށް ހާއްސަ ސަމާލުކަމެއް ދޭންޖެހޭ ކަމެކެވެ.
ކަމުގެ ނުރައްކާތެރިކަން ވަޒަންކޮށްލުމަށް އަޅުގަނޑާއެކު ހިންގަވާށެވެ. ބަނގުރާބުއިމާއި އޫރުމަސްކެއުމަކީ ކިހާ ވަރެއްގެ ކަމެއްތޯ އެވެ؟ އާދަވެގެން ނަމާދުކޮށް ނޫޅޭ ދިވެހި މުސްލިމުން ވެސް ބަނގުރާ ނުބޮއިވޭތޯ ބަލަ އެވެ. އަދި ސިއްރުސިއްރުން ބަނގުރާ ބޮއި އުޅޭ ދިވެހިން ވެސް އޫރުމަސް ނުކައިވޭތޯ ބެލުމަށް ހާއްސަ ސަމާލުކަމެއްދޭކަން ދިވެހި ޒުވާނުން އަޅުގަނޑާ ކޮށްއުޅޭ ސުވާލުތަކުން ފާހަގަކުރެވިފައިވެ އެވެ. ރާއްޖެއަކީ އިސްލާމީ ގައުމަކަށްވީ ނަމަވެސް، އިސްލާމްދީނުގައި ފާފައިގެ ގޮތުގައި ކަނޑައަޅާފައިވާ ހުރިހާ ކަންކަމަކީ ގާނޫނީ ގޮތުން ތަހުގީގުކޮށްގެން އަދަބުދޭ ކަންކަމެއް ނޫނެވެ. ނަމަވެސް ބަނގުރާބުއިމާއި އޫރުމަސްކެއުމަކީ ޖިނާއީ ކުށެއްގެ ގޮތުގައި ވެސް ގާނޫނުން ކަނޑައަޅާފައި އޮވެ އެވެ. މި ދެ ފާފައިގެ ބޮޑުކަން ދިވެހިންނަށް ތަސައްވުރުކުރެވޭތީ އެވެ.
ހުޖުރާތު ސޫރަތުގެ 12 ވަނަ އާޔަތުގައި މާތް ﷲ އަންގަވާފައި ވެ އެވެ. "އޭއީމާންވެއްޖެ މީސްތަކުންނޭވެ! ތިޔަބައިމީހުން ގިނަ ހީތަކާ ދުރުވެގަންނާށެވެ. ހަމަކަށަވަރުން ބައެއް ހީއަކީ ފާފައެކެވެ." އަދި ހަދީސް ބަސްފުޅުގައި ވެ އެވެ. ތިޔަބައިމީހުން ހީތަކާ ދުރުވެގެންނާށެވެ. ހަމަކަށަވަރުން ހީއަކީ ވާހަކައިގެ ތެރެއިން އެންމެ ދޮގުވެރި ކަންތަކެވެ." -ބުޚާރީ-
ދުރުވެގެންނާށޭ އޮތް ބަސްފުޅަށް ތަންކޮޅެއް ފުންކޮށް ވިސްނާލުން މުހިންމެވެ. ބަނގުރާ ހަރާންކުރެއްވި އާޔަތުގައި ވެސް އޮތީ "ދުރުވެގަންނާށޭ" އެވެ. އެއީ ވެސް ގުރުއާނުގެ އާޔަތެކެވެ. މިއީ ވެސް ގުރުއާނުގެ އާޔަތެކެވެ. ބަނގުރާއަކީ ނުބައިތަކުގެ މަންމަ އެވެ. ހީއަކީ ފިތުނައިގެ އޮށެވެ. ދޮގު އުފެދެނީ ހީތަކުގެ ސަބަބުންނެވެ. ގީބަބުނުމުގެ ގަސްފަޅަނީ އެއޮށުންނެވެ. ނެތިމޮށުމާއި ދެބައޮޑުވުން ހެދިފޯދިގަންނަނީ ހީތަކުގެ ދަނޑުބިމުންނެވެ. މިއިން ކޮންމެ ކަމަކުން ގޮފިލައި ހެދޭ ރުޅިވެރިކަމާއި ދެކޮޅުވެރިކަމުގެ ކަށިކުނބުރު ވާތައް ގުނާއަދަދުނުކުރެވޭނެ އެވެ.
ހުޖުރާތު ސޫރަތުގެ 12 ވަނަ އާޔަތުގައި އެއްބަޔަކު އަނެއްބަޔަކަށް ނެތި މޮށެ ގީބަބުނުން މަނާކުރައްވާފައިވެ އެވެ. އަދި އެއީ އިންސާނާ އޭނާ ފަދަ އަނެއް އިންސާނާގެ މުޅަ މަސްގަނޑު ކެއުން ފަދަ ކަމެއްކަމުގައި ސިފަކޮށްފައިވެ އެވެ. އެހެންވީމާ ނެތިމޮށުމާއި ގީބަ ބުނުމަކީ އޫރުމަސް ކެއުމަށްވުރެ ފާފައިގެ ގޮތުން ކުޑަކަމެއްތޯ ވިސްނާލުން ބުއްދިވެރި އެވެ.
އަޅުގަނޑާއެކު މީސްމީޑިއާގެ އެކި ވަސީލަތްތަކުގައި ލޯ ހިންގާ ބަލާލަބަލާށެވެ! އެކަކު އަނެކަކަށް ކުރާ ތުހުމަތުތައް ހުރީ ކިހާ މިންވަރަކަށްތޯ ވިސްނާ ފިކުރުކޮށްލުމަށެވެ. އަޅުގަނޑުމެންގެ ތެރޭގައި ކޮންމެ ކަމަކަށް އިދާރާތައް ހެދިފައި އެބަހުއްޓެވެ. މީހަކާ މެދު ތުހުމަތެއް އޮތްނަމަ އެތަނަކަށް މައްސަލަ ހުށަހަޅައިން ބެލުމުގެ މަގުތައް ތަރުތީބުވެފައި އެބަހުއްޓެވެ. އެއިން އެއްވެސް ތަނަކަށް މައްސަލައެއް ހުށަހެޅުމެއް ނެތި ތަފާތު އެކި ތުހުމަތުތައް މީހުންނާ މަތިކުރުމުގައި ވަގުތުތައް ހޭދަވެގެންދާދިއުމުގައި އެކަމުގައި 'އަބުރުވެރި އަދި ގަދަރުވެރި' ބޭބޭފުޅުންވެސް ބައިވެރިވާ ތަން ފެންނަނީ މަދެއްކޮށެއްނޫނެވެ. އޭގެ ސަބަބުން އުފަންވާ ދެކޮޅުވެރިކަމާއި ރުޅިވެރިކަމާއި ހަސައިދައިގެ މޫތަކުން ސުލްހަވެރިކަމުގެ ބިނާތަކުގެ ބިންގަލުން ފެށިގެން ރެނދުއަޅަމުންދަނީ ހަލުވި ބާރުމިނުގަ އެވެ.
އެންމެ ފުރަތަމަ ކޮށްލެވެނީ ހީއެކެވެ. އެއަށްފަހު ބުނުމާއި ނުވަތަ ލިޔުމާއެކު ފެތުރިގެންދިއުމެވެ. ދެން އުފެދެނީ ޒުވާބާއި ރުޅިވެރިކަމެވެ. ހަސަދަވެރިކަމާއި ނަފުރަތެވެ. ކޮންމެ ހީއަކުން ކިތައް ޒުވާބު، ކޮންމެ ޒުވާބަކުން ކިތައް ބައިބައިވުން އެބަ އުފެދޭތޯ އެވެ؟ ނަތީޖާއަކީ ކޮބައިތޯ އެވެ؟ ގުޅުންތައް ހީނަރުވެ ހިތްތައް ވިހަވުމެވެ. މުޅި މުޖުތަމައު ފަސާދަވުމެވެ. ވީމާ، މީސްމީޑިއާގެ 'ކިންގަކަށް ނުވަތަ ކުއީނަކަށް' ވުމަށް، ނުވަތަ ނޫސްވެރިޔާ ލިޔާ ލިޔުން ގިނައިން ދައުރުކުރުމަށް، ފިތުނައިގެ އޮށް ނީންދާށެވެ. އަދި އެހެން މީހަކު އިންދާ ފިތުނައިގެ އޮށަށް ފެންދޭ މީހަކަށްވެސް ތިބާ ނުވާށެވެ. މީހަކާ ބެހޭ ގޮތުން ވާހަކައެއް ދައްކަންޖެހިއްޖެނަމަ، މި ކުރެވޭ ކަމަކީ ގާތްނުވާން އަމުރުކުރެވުނު ފަދަ ހީތަކުގެ ތެރޭގައި ހިމެނިދާނޭ ކަމެއްތޯ ތަކުރާރުކޮށް ވިސްނާށެވެ.
މާތް ނަބިއްޔާ ސައްލަﷲ އަލައިހި ވަސައްލަމް އެކަލޭގެފާނުގެ ސަހާބީންނަށް ހަދީސް ކުރެއްވި އެވެ. ބަނގުރޫޓުވެފައިވާ މީހަކީ ކާކުކަން ތިޔަބައިމީހުން ދެނެތިބީމު ހެއްޔެވެ؟ ސަހާބީން ދެންނެވި އެވެ. އެއީ އަހަރެމެންކުރެ އެމީހެއްގެ އަތުގައި މުދަލެއް ފައިސާއެއް ނުވާ މީހާ އެވެ. ހަދީސް ކުރެއްވި އެވެ. ހަމަކަށަވަރުން ތިމަންކަލޭގެފާނުގެ އުންމަތުގައި ބަނގުރޫޓުވެފައިވާ މީހާ ގިޔާމަތް ދުވަހުގައި އަންނާނީ ނަމާދާއި ރޯދައާއި ޒަކާތާއި ހިފައިގެންނެވެ. އެކަމަކު އޭނާ އަންނައިރުގައި އޭނާ އޮންނަނީ އެވެނި މީހާއަށް ބަދުބަސްބުނެފައި މިވެނި މީހާގެ ނެތޮމޮށިފަ އެވެ. އަދި މިމީހާގެ މުދާ ކައިފައި އެމީހާގެ ލޭއޮހޮރުވާފަ އެވެ. އަނެއް މީހާ ގައިގައި ތަޅާފަ އެވެ. ދެން އޭނާއަށް ކުރެވިފައި ހުރި ހެޔޮކަންތަކުން ނަގާފައި އެމީހާއަށާއި މިމީހާއަށް ދެވެ އެވެ. އޭނާގެ މައްޗަށް އެފަދައިން އޮތް ބަދަލުދިނުން ނުނިމެނީހުން އޭނާގެ ހެޔޮކަންތައްތައް އެކީ ހުސްވެއްޖެނަމަ ދެން އެމީހުންގެ ފާފަތައް ނަގައި އޭނާއާ ޒިންމާކުރެވެ އެވެ. އެއަށްފަހު އޭނާ ނަރަކައަށް އެއްލާލެވެ އެވެ. -ޞަޙީޙް މުސްލިމް-
އަޅުގަނޑުމެންގެ އިހުތިބީންނާއި ކާބަފައިން މި ހަދީސް ބަސްފުޅު ނެންގެވީ ވަރަށް ސީރިއަސްކޮށްނެވެ. އިމާމް ހަސަންގެފާނާ މެދު ނެތިމޮށެ ގީބަބުނި މީހެއްގެ ހަބަރު އެކަލޭގެފާނަށް ލިބިވަޑައިގަތެވެ. އެވާހަކަތައް ދެއްކި މީހާއަށް ހަސަންގެފާނު ކަދުރު ދޮލަނގެއް ފޮނުއްވި އެވެ. އަދި އެމީހާ ކައިރީ ބުނުމަށް އެދިވަޑައިގަތެވެ. ތިބާގެ ހެޔޮކަންތަކުން ބައެއް އަހަންނަށް ހަދިޔާކުރި އަޑުއަހައިފީމެވެ. އެހެންވެ އޭގެ ބަދަލު ދެވޭތޯ މި ކަދުރު ދޮލަނގު ފޮނުވަމެވެ. ނަމަވެސް މިއީ ކޮށްދެއްވި ހެޔޮކަންތަކާ އެންމެ އެކަށީގެންވާވަރުކަމަށް ނުވާތީ މާފަށް އެދެމެވެ.
އަޅުގަނޑުމެންނަކީ ބަނގުރާ ބުއިމާއި އޫރުމަސްކެއުމަށް ނުރުހުންވެގެންތިބި މުސްލިމުންނެވެ. މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތަކުގައި ބަނގުރާ ވިއްކުމަށް އިންތިހާއަށް ދެކޮޅުހަދާ ސައްތައިން ސައްތަ މުސްލިމް ދިވެހިންނެވެ. ގީބަބުނުމާއި ނެތިމޮށުމާއި ދެބައޮޑުވުމަށް ނަފުރަތުކުރުމުގައި ވެސް އަޅުގަނޑުމެން ސިފަކުރުމަށް އިސްވެ ބުނެވުނު ފަދަ އިބާރާތެއް ބުނެވޭނެނަމަ ކޮންފަދަ ހެއްޔެވެ؟ ބަނގުރާއަށް އަޅުގަނޑުމެން ދެކޮޅު ހަދަނީ އެއީ ނުބައިތަކުގެ މަންމަ ކަމަށްވާތީ އެވެ. ހީތަކާއި ތުހުމަތުގެ ބަސްތަކަށް ދެކޮޅު ހެދުމަށް އެއިން އުފަންކުރުވާހާ ފިތުނައިގެ ވައްތަރުތައް ނުފުދޭތޯ އެވެ؟
