ޕަޓީނާ މޯލްޑިވްސްގެ ފަރި އައިލެންޑް މެއި، 18 ވަނަ ދުވަހު ހުޅުވަން ތައްޔާރު ވެއްޖެ އެވެ.
މިއީ ކްރޮސްރޯޑްސް މޯލްޑިވްސްގެ ކޮންސެޕްޓަށް ކ. ރަށްފަޅުހުރާ ފަޅު ތެރޭގައި ތަރައްގީކޮށްފައިވާ މަތީ ފަންތީގެ ތިން ރިސޯޓުގެ ތެރެއިން އެއް ރިސޯޓެވެ. އެއާޕޯޓުން ސްޕީޑްބޯޓުގައި މި ރިސޯޓަށް 45 މިނިޓުން ދެވެ އެވެ.
މި ރިސޯޓުގައި އެއް ކޮޓަރި އާއި ދެ ކޮޓަރި އަދި ތިން ކޮޓަރީގެ 90 ބީޗް އަދި ވޯޓާ ޕޫލް ވިލާ ހުރެ އެވެ. ހުރިހާ ވިލާއެއްގައި ވެސް ޕޫލާއި މިހާރުގެ މަތީފަންތީގެ ރިސޯޓުތަކުގެ ރޫމުތަކުގައި ހުންނަ ގިނަ ވަސީލަތްތަކާއި ހިދުމަތްތައް ލިބެ އެވެ.
ރިސޯޓުގެ ހުރިހާ ވިލާއެއް ފަރުމާކުރީ ތިމާވެއްޓާ ރައްޓެހި އަދި ރަށުގެ ވަށައިގެންވާ ވެއްޓާ ގުޅޭ ކުލަތައް ބޭނުންކޮށްގެންނެވެ. މި "ރަސްޓިކް" ޑިޒައިންގައި ގިނައިން ބޭނުން ކޮށްފައި ވަނީ ވަކަރާއި ބިއްލޫރި އެވެ.
ޕަޓީނާ މޯލްޑިވްސް، ފަރި އައިލެންޑްސްގެ ސަންސްޓް ބީޗް ޕޫލް ވިލާއެއް
ޕަޓީނާ ފަރި އައިލެންޑުގެ އެންމެ ބޮޑު ވިލާއަށް ކިޔަނީ "ދަ ބީޗް ހައުސް" އެވެ. ދެ ފަންގިފިލާގެ މި ވިލާގެ ޖާގައަކީ އެއްފަހަރާ 6 މީހުންނާއި ތިން ކުޑަކުދިންނެވެ.
މިއީ ބޮޑެތި އާއިލާތަކަށާއި ގްރޫޕްތަކަށް ހާއްސަ ވިލާއެކެވެ. ބޭނުން ނަމަ ކައިރީގައި ހުންނަ އެއް ކޮޓަރީގެ ހަ ބީޗް ޕޫލް ވިލާ އެއްކޮށްލައިގެން، ކުޑަކުދިން ހިމެނޭ ހެން 27 މީހުންނަށް ތިބެވޭނެ އެވެ.
ޕަޓީނާ މޯލްޑިވްސް ފަރި އައިލެންޑްސްގެ ބީޗް ހައުސް
ޕަޓީނާ މޯލްޑިވްސްގައި "ފަރި ސްޓޫޑިއޯސް" ކިޔާ، ސްޓޫޑިއޯ އެޕާޓްމަންޓް ސްޓައިލަށް ޑިޒައިން ކުރެވިފައިވާ 20 ސްޓޫޑިއޯ ހުރެ އެވެ. ފަރި ސްޓޫޑިއޯތައް ޑިޒައިން ކުރީ ބްރެޒިލްގެ މަޝްހޫރު އާކިޓެކްޓެއް ކަމުގައިވާ ސްޓޫޑިއޯ އެމްކޭ27ގެ މާސިއޯ ކޯގަން އެވެ.
މި ސްޓޫޑިއޯތައް ހުންނަނީ ބީޗާ ތަންކޮޅެއް ދުރުގައި، ރަށުގެ މެދު ތެރޭގަ އެވެ. މިއީ ރަށުގެ ފެހިކަން ގަދަ ސަރަހައްދުގައި، ވަށައިގެންވާ ވެށީގެ ރީތިކަން ދައްކައި ދޭން ހާއްސަ ސަމާލުކަމެއް ދީގެން ޑިޒައިން ކުރި ސްޓޫޑިއޯތަކެކެވެ.
ޕަޓީނާ މޯލްޑިވްސް ފަރި އައިލެންޑްސްގެ ފަރި ސްޓޫޑިއޯ
މި ރިސޯޓުން އޭޝިއާ އާއި ގްރީކް ރަހަތަކަށް ހާއްސަ ރެސްޓޯރަންޓަކާއި އިންޓަނޭޝަނަލް ކުޒީންއަށް ހާއްްސަ ރެސްޓޯރަންޓްތަކެއް ހުރެ އެވެ. ރެކްރިިއޭޝަނަލް ވަސީލަތްތަކުގެ ތެރޭގައި އަކުއަޓިކް ތެރަޕީއަށް ހާއްސަ ވަޓްސޫ ޕޫލެއް، ވޯޓާ ސްޕޯޓްސް ސެންޓަރެއް، ޓެނިސް ކޯޓެއް އަދި ޔޯގާ ޕެވިލިއަންއެއް ހިމެނެ އެވެ.
ކ. ރަށްފަޅުހުރާ ފަޅު ތެރޭގައި ތިން ރިސޯޓުގެ ތެރެއިން ކަޕެލާ ރިސޯޓަކީ ވެސް ޕަޓީނާ މޯލްޑިވްސް ހިންގާ ޕޭރެންޓު ކުންފުނީގެ ރިސޯޓެކެވެ. ދެން އޮތް ރިސޯޓަކީ މަޝްހޫރު ރިޒް-ކާލްޓަންގެ ރިސޯޓެކެވެ. މި އަހަރުގެ ތެރޭގައި މި ހުރިހާ ރިސޯޓެއް ހުޅުވާނެ އެވެ.
މިއީ ރާއްޖޭގައި މި އަހަރު ހުޅުވަން ހަމަޖެހިފައިވާ 15 ރިސޯޓުގެ ތެރެއިން ރިސޯޓުތަކެކެވެ. މި އަހަރު ހުޅުވަން ހަމަޖެހިފައިވާ އިތުރު ރިސޯޓުތަކުގެ ތެރޭގައި އެޑްރެސް މަޑިވަރު މޯލްޑިވްސް ރިސޯޓާއި، އަވާނީ ފަރެސް ރިސޯޓުގެ އިތުރުން ލެ މެރެޑިއާން މޯލްޑިވްސް އާއި ދަ ޗެޓީ ކުޑަވިލިގިނލި ހިމެނެ އެވެ.
