އިސްލާމްދީނުގެ އާންމު މަގުސަދުތަކުގެ ތެރޭގައި ހިމެނޭ އެންމެ މުހިންމު އެއް ބަހާއަކީ، ނަފުސުގެ ރައްކާތެރިކަން ހޯދައިދިނުމެވެ. ތިމާއާއި އަނެކުންގެ ނަފުސުގެ ރައްކާތެރިކަމެވެ. އެހެންވެ ނަފުސުގެ ހައްގުތަކަށް އަރައިގަތުމުގެ އެންމެހާ ދޮރުތަކެއް އިސްލާމްދީން ވަނީ ބަންދުކޮށްފަ އެވެ. ބުނާ ބަހަކުން ކުރާ ކަމަކުން ނުވަތަ އެނޫންވެސް ގޮތަކުން އަނެކާގެ ނަފުސުގެ ހުރުމަތާއި އިއްޒަތަށް އަރައިގަތުމަކީ ކަނޑައެޅިގެން އިސްލާމްދީނުގައި ވަރަށް ބޮޑަށް މަނާކުރެވި ނަހީކުރެވިފައިވާ ކަމެކެވެ.
އިމާމް ބުޚާރީ ރިވާކުރައްވާފައިވާ ހަދީސެއްގެ މާނައިގައިވެ އެވެ.
"މުއުމިނަކަށް ކާފަރުކަމުގެ ތުހުމަތުކޮށްފިމީހާ، ފަހެ އެމީހަކު އޭނާ ގަތުލުކުރި ފަދަ އެވެ."
ބުޚާރީ ރިވާކުރައްވާފައިވާ އެހެން ހަދީސް ބަސްފުޅެއްގައިވެ އެވެ.
"މީހަކު އޭނާގެ އަހާއާ ދިމާއަށް އޭ ކާފަރު އޭ ބުނެފިނަމަ ފަހެ އެދެމީހުންކުރެ ކޮންމެވެސް އެކަކު ކާފަރުކަމުގެ ސިފަލިބިގަނެއްޖެ އެވެ."
މާނައަކީ ރައްދުކުރެވޭ މީހާއަކީ އެސިފަ ލިބިގެންނުވާ މީހެއްކަމަށްވާނަމަ، އެބަސް ބުނާ މީހާ ކާފަރުކަމުގެ ސިފައިން ސިފަޖެހިގެންދިއުމެވެ.
އެތައް މަގާމެއްގައި އެކިބަސްފުޅުތަކުން އަހަރެމެންގެ މާތް ނަބިއްޔާ ޞައްލަﷲ ޢަލައިހިވަސައްލަމް ވަނީ މީސްތަކުން ކާފަރުންގެ ގޮތުގައި ސިފަކުރުމާއި ފާސިގުންގެ ގޮތުގައި ސިފަކުރުމާ މެދު އިންޒާރުދެއްވައި ކަމުގެ ނުރައްކާތެރިކަމާއި ބިރުވެރިކަން ބަޔާންކޮށްދެއްވާފަ އެވެ. ބުޚާރީގައި އައިސްފައިވާ ހަދީސެއްގައިވެ އެވެ.
"ތުހުމަތުކުރެވޭ މީހާއަކީ، ތުހުމަތުކުރެވުނު ސިފައިން ސިފަލިބިފައިވާ މީހަކަށް ނުވާނަމަ، އެބަސް ބުނި މީހަކަށް އެބަހެއް ރައްދުވެގެންދާނެ ގޮތެއްގައި މެނުވީ، މީހަކަށް އެހެން މީހަކާ ދިމާއަށް އޭނާއަކީ ކާފަރެއްކަމުގެ ތުހުމަތު ނުވަތަ ފާސިގެއްގެ ކަމުގެ ތުހުމަތު ނުކުރެވޭނެ އެވެ."
މާނަ އިތުރަށް ބަޔާންކުރަން ނުޖެހޭހާ ސާފެވެ. ތިމާގެ ތުހުމަތު ރަނގަޅުނޫންނަމަ އެފަދަ މީހަކީ ތިމާއެވެ.
އިސްލާމްދީންވަނީ މުސްލިމުންގެ މުދަލާއި އަބުރަކީ ސަލާމަތްތެރިކަން ލިބިގެންވާ ރައްކާތެރިކަންލިބިގެންވާ އެއްޗެއްކަމުގައި ހަދާފަ އެވެ. އިހްލާސްތެރިކަމާއެކު ޝަހާދަތުގެ ދެކަލިމަ ކިޔާ އިސްލާމްދީންގެ ހުކުމްތަކަށް ތަބާވެއްޖެ މީހަކީ މުސްލިމެކެވެ. މުއުމިނެކެވެ. ހަދީސެއްގައިވެ އެވެ.
"އަހަރެމެންކުރާ ފަދައިން ނަމާދުކޮށްފައި، އަދި އަހަރެމެން ފަދައިން އަހަރެމެންގެ ގިބުލައަށް ކުރިމަތިލައިފައި އަދި އަހަރެމެންގެ ގުރުބާންތަކުން ކައި އުޅޭ ކޮންމެ މީހަކީ، ފަހެ އޭނާއަކީ މާތް ﷲ ގެ ރައްކާތެރިވެވޮޑިގަތުމާއި އަދި އެކަލާނގެ ރަސޫލާގެ ރައްކާތެރިކަން ލިބިގެންވާ މީހެކެވެ. ފަހެ ތިޔަބައިމީހުން ﷲ ގެ ރައްކާތެރިވެވޮޑިގަތުމަށް ކުޑައިމީސްނުވާށެވެ." - ބުޚާރީ -
އުމްދަތުލްގާރީއޭ ކިޔުނު ފޮތުގައި އިމާމުލްއައިނީ ރަހިމަހުﷲ ދެންމެ މިބުނެވުނު ހަދީސްގެ ޝަރަހައިގައި ވިދާޅުވަނީ އެ ހަދީސުގައި އެވާ ކަންކަމަކީ ﷲ ގެ އެއްކައުވަންތަކަމަށް ހެކިވެ މުޙައްމަދުގެފާނުގެ ރިސާލަތަށް އިޢުތިރާފުނުވާ މުސްލިމެއްގައި މެނުވީ އެއްވެފައި ނުހުންނާނެ ކަންކަމެވެ.
މުސްލިމަކު ކާފަރެއްގެ ގޮތުގައި ސިފަކުރުމަކީ، ބޮޑު ފާފައިގެ ތެރެއިން ހިމެނޭ ކަމެކެވެ. ﷲ އާއި އެކަލާނގެ ރަސޫލާއާއި އާހިރަތް ދުވަހަށް އީމާންވާ މީހަކާދިމާއަށް ކާފަރެކޭ ބުނެ އިޝާރާތްކުރުން ހުއްދަވެގެން ނުވެ އެވެ. ހައްޖަތުލް ވަދާއުގެ މަޝްހޫރު ހުތުބާގައި މާތް ނަބިއްޔާ ހަދީސްކުރައްވާފައިވެ އެވެ.
"ފަހެ ހަމަކަށަވަރުން ﷲ ތަބާރަކަ ވަތައާލާ ވަނީ ތިޔަބައިމީހުންގެ ލެޔާއި ތިޔަބައިމީހުންގެ މުދަލާއި އަދި ތިޔަބައިމީހުންގެ ޢަބުރަކީ ހައްގަށްޓަކައި މެނުވީ، ތިޔަބައިމީހުންގެ މައްޗަށް ހުރުމަތްތެރިކޮށްފަ އެވެ. ހުރުމަތްތެރިވެގެންވާ މިޙައްޖުމަހުގެ ޙުރުމަތްތެރިވެގެންވާ މައްކާގައި ޙުރުމަތްތެރިވެގެންވާ މިޙައްޖު ދުވަހުގެ ޙުރުމަތްތެރިކަމާ އެއްފަދައިންނެވެ."
ހަދީސްކުރައްވާފައިވެ އެވެ. ތިމަންކަލާގެފާނަށްފަހު އެއްބަޔަކު އަނެއް ބަޔެއްގެ ކަނދުރާގައި ކަނޑިންޖަހައި، ކާފަރުންގެ ގޮތުގައި ތިޔަބައިމީހުން އެނބުރި ނުގަންނަހުށިކަމެވެ." - ބުޚާރީ -
މިހާބޮޑަށް މިކަމަށް އިސްލާމްދީނުގައި ބާރުއަޅާފައިވަނީ ސަބަބުތަކެއް އޮވެގެންނެވެ. ޒަމާނުގެ ފުރޮޅުންތަކާއެކު ކޮންމެ ކަމެއް ބަދަލުވާ އުސޫލުން ކާފަރުކަމާއި ފާސިގުކަމުގެ ތުހުމަތުކުރުމުގެ ވައްޓަފާޅިއާއި ގޮތް ބާވަތް ބަދަލުވެގެންދިއުމަކީ މި ހަދީސް ބަސްފުޅުތަކުގައި އައިސްފައިވާ އިންޒާރުން ސަލާމަތްކަން ލިބިގެންދާނެ ކަމެއްކަމުގައި ނުފެނެއެވެ.
ބަޔާންވެދިޔަ ހަދީސް ބަސްފުޅުތަކުން ނަހީކުރެވިފައިވަނީ، ނަފުސުގެ ޙުރުމަތަށް އަރައިގަތުމެވެ. އަދި އެއުސޫލުތަކުން ގަސްދުކުރެވިފައި އޮތް ހަގީގަތަކީ، ނަފުސުގެ ކަރާމަތަށް ގެއްލުންލިބޭ ކޮންމެ ކަމެއް ދުރުކުރުމެވެ. އަޅުގަނޑުވެސް ގަބޫލުކުރަމެވެ. މިވެނި އެވެނި މީހަކީ ކާފަރެއް ކަމަށް ނުވަތަ ފާސިގެއްކަމަށް ބުނެ އާންމު މަންސަތަކުގައި ވާހަކަދައްކައި އުޅުމަކީ އަހަރެމެންގެ ތެރޭގައި އާންމުވެފައިވާ ކަމެއް ނޫނެވެ. އެހެން ނަމަވެސް ނުސީދާ މަގުން ނުސީދާ ބަސްތަކުން މީސްމީހުންނާ ދިމާއަށް އިޝާރާތް ލިބޭ ގޮތަށް އެފަދަ ވާހަކަތައް އާންމުކޮށް ދެއްކުން ގިނަވާ ދުވަސްވަރުތައް ދޭތެރެ ދޭތެރެއިން ފެންމަތިވެ ތިލަވަމުންދެއެވެ.
މީގެ އެންމެ ނުރައްކާތެރިކަން ގުޅެނީ އަލަށް ދީންވެރިވެ ދީނުގެ ޝައުގާއި ޖޯޝުގައި ތިބޭ ބޮޑެތި ނުވާ ޒުވާނުންގެ ސިކުނޑިތަކަށް، ކިޔަވައިގެން ތިބި ހަރުމީހުންގެ ނުސީދާ މެސެޖްތަކުން ކުރަމުންދާ އަސަރުތަކާއި، އެކަމުގެ ނަތީޖާތަކެވެ. އިލްމުވެރިންނާއި އިލްމުވެރިންގެ ޖަމާޢަތްތަކަށް ނިސްބަތްވާ ފަރާތްތަކުން ސޯޝަލް މީޑިއާގެ ވަސީލަތްތައް ބޭނުންކުރުމުގައި ވަރަށް ބޮޑު ޒިންމާދާރުކަމެއް ބެހެއްޓުމަކީ ބަޔާންވެދިޔަ ހަދީސްތަކަށް ބަލާއިރު، ސަމާލުކަން މަތިމައްޗަށް ދޭންޖެހޭ ކަމެކެވެ. ވަކި މީހަކީ މުސްލިމެއް ނޫންކަމަށް ކަނޑައެޅިގެން ނުބުނި ނަމަވެސް، މުޖުތަމައުގައި އާންމު އިންސާނުން ދީންވެރިކަމަށް ގަބޫލުކުރާ ފަދަ ބޭބޭފުޅުން، އެފަދަ ނުސީދާ އިޝާރާތްތަކުން އިޝާރާތްކުރުމަކީ، ޖޯޝުން ފުރިފައިވާ އިލްމުގެ ގޮތުން މަދު ޅަޒުވާން ސިކުނޑިތަކުގެ ނުސިޔާނުކަމާ މުޖުތަމައު ކުރިމަތިލާންޖެހިދާނެ ނުރައްކާތެރި އިންޒާރެއްގެ ރަނގަބީލެކެވެ. މާޒީގައި މިކަން ދިވެހިން ވަނީ ދެކެފަ އެވެ.
