މެޑްރިޑް (އޭޕްރީލް 18) - ސްޕެނިޝް ކަޕްގެ ފައިނަލުގައި ލިއޮނަލް މެސީގެ ދެ ގޯލާ އެކު 4-0 އިން އެތުލެޓިކް ބިލްބާއޯ ބަލިކޮށް ބާސެލޯނާ އިން ސްޕެނިޝް ކަޕްގެ ޗެމްޕިއަންކަން މިރޭ ހޯދައިފި އެވެ.
މިއީ ދެ ހަފްތާއެއްހާ ދުވަސްތެރޭ ސްޕެނިޝް ކަޕްގެ ފައިނަލުން އެތުލެޓިކް ބިލްބާއޯ ބަލިވި ދެ ވަަނަ ފަހަރެވެ. މިދިޔަ އަހަރު ކޮވިޑާ ހެދި މިދިޔަ ސީޒަންގެ ސްޕެނިޝް ކަޕް ފައިނަލް މެޗު ކުޅުނީ މި މަހު ތިން ވަަނަ ދުވަހު އެވެ. އެ މެޗުން ބިލްބާއޯ ބަލިކޮށް ތަށި އުފުލާލީ ރެއާލް ސޮސިއެޑާޑުންނެވެ.
ބާސެލޯނާ މި މެޗުން މޮޅުކޮށްދޭން ދެ ގޯލު ޖަހައިދިން މެސީ މި ސީޒަނުގެ ނިޔަލަށް އެ ޓީމުގެ ކޮންޓްރެކްޓްގައި ހުރިއިރު، މިއީ މެސީ އެ ޓީމާ އެކު އުފުލާލާ ފަހު ޓްރޮފީ އަށް ވުމުގެ ފުރުސަތު އެބައޮތެވެ. ބާސެލޯނާ އިން އަންނަނީ ސްޕެނިޝް ލީގުގެ ރޭހުގައި ވެސް ވާދަކުރަމުންނެވެ. ސްޕެނިޝް ކަޕަކީ މި ސީޒަނުގައި ބާސެލޯނާ ކޯޗުކަމާ ހަވާލުވި ރޮނާލްޑް ކޫމަންގެ އިރުޝާދުގެ ދަށުން އެ ޓީމު ހޯދި ފުރަތަމަ ތަށްޓެވެ.
ފައިނަލަށް ފަހު މެސީ ތަށި ހިފައިގެން.-- ފޮޓޯ: ބާސެލޯނާ
ފުރަތަމަ ހާފުގައި ބިލްބާއޯ އިން ބާސެލޯނާ ހިފެހެއްޓުމުގައި ކާމިޔާބު ހޯދި އެވެ. އެކަމަކު ދެ ވަނަ ހާފްގެ ފެށިގެން 15 މިނިޓަށް ފަހު ބާސެލޯނާ އިން ގޯލެއް ޖަހައި މެޗުގެ ކޮންޓްރޯލް ފުރިހަމަ އަށް ނެގި އެވެ. މެޗުގެ 60 ވަނަ މިނިޓްގައި ފްރެންކީ ޑި ޔޯން ދިން ބޯޅައަކުން ބާސެލޯނާގެ ފުރަތަމަ ގޯލު ޖެހީ އެންޓޮއިން ގްރީޒްމަން އެވެ. އޭގެ ތިން މިނިޓް ފަހުން ޖޯޑީ އަލްބާ ދިން ބޯޅައަކުން ޑި ޔޯން ވަނީ ބާސެލޯނާގެ ލީޑުފުޅާކޮށްދީފަ އެވެ.
ބިލްބާއޯ އަށް ހަމަނޭވައެއް ނުލެވި އުޅެނިކޮށް މެޗުގެ 68 ވަނަ މިނިޓްގައި މެސީ ވަނީ ބާސެލޯނާގެ ތިން ވަނަ ގޯލު ޖަހައިފަ އެވެ. މިއީ މެސީގެ ހާއްސަ ގޯލެކެވެ. ބޯޅަ ހިފައިގެން ބިލްބާއޯ ޑިފެންސް ތެރެއިން ވަދެ މެސީ ފޮނުވާލި ބޯޅަ އަމާޒުވީ ގޯލުގެ ކަނަށެވެ. އޭގެ ހަތަރު މިނިޓް ފަހުން އަލްބާ ދިން ބޯޅައަކުން މެސީ ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ. ފަހުން ގްރީޒްމަން އިތުރު ގޯލެއް ޖެހި އެވެ. އެކަމަކު ރެފްރީ ނިންމީ އެއީ އޮފްސައިޑް ގޯލެއް ކަމަށެވެ.
މިއީ ބާސެލޯނާ އިން ކޮޕަ ޑެލް ރޭ ކާމިޔާބުކުރި 31 ވަނަ ފަހަރެވެ. ބާސެލޯނާ އިން އެންމެ ފަހުން މި މުބާރާތް ކާމިޔާބުކުރީ 2018 ވަަނަ އަހަރު އެވެ. އެ ފަހުން 2019 ވަނަ އަހަރު ކުޅުނު ފައިނަލުގައި ވަނީ ވެލެންސިއާ އަތުން 2-1 އިން ބަލިވެފަ އެވެ.
