ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި މާލޭގެ އިތުރުން އައްޑޫ ސިޓީގެ ބައެއް ދާއިރާތަކުގެ ނަތީޖާއާ މެދު ވެރިކަން ކުރާ މައި ޕާޓީ، އެމްޑީޕީން ސުވާލު އުފެއްދި ނަމަވެސް، އެއްވެސް ފޮއްޓެއް އަލުން ގުނަން އަދި ނިންމާފައިވާ ނުވާ ކަމަށް އިލެކްޝަންސް ކޮމިޝަން (އީސީ)ން މިއަދު ބުނެފި އެވެ.
އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ މާލޭގެ ހަތަރު ދާއިރާއެއްގެ ފޮށި އަލުން ގުނަން އެ ޕާޓީގެ ފަރާތުން ހުށަހަޅާފައިވާ ކަމަށެވެ.
އޭގެ ފަހުން، ރޭ އެމްޑީޕީން ނެރުނު ބަޔާނެއްގައި ބުނީ މާލޭގެ ފަސް ދާއިރާއަކާއި އައްޑޫގެ ހަތަރު ދާއިރާއެއްގެ ނަތީޖާ އިތުރަށް ކަށަވަރުކުރުމަށް މަސައްކަތްކުރާ ކަމަށާއި އެ ދާއިރާތަކުގައި މިހާރު ކުރީގައި އުޅޭ ކެންޑިޑޭޓާއި އެމްޑީޕީގެ ކެންޑިޑޭޓުންނާ ދެމެދު ހުރީ 40 އަކަށް ވޯޓަށްވުރެ ކުޑަ ފަރަގެއް ކަމަށެވެ.
އަދި އެ ދާއިރާތަކުގައި ނުގުނާ ހުރި ވޯޓް ކަރުދާހުގެ އަދަދު 50 އާއި 60 އަށް އަރާ ކަމަށް ބަޔާނުގައި ބުނެފައިވެ އެވެ.
"މި ޕާޓީން މި ގެންދަނީ އެ ވޯޓު ފޮށިތަކުގެ ފުރިހަމަ ނަތީޖާ ދެނެގަތުމުގެ މަސައްކަތް ކުރަމުންނެވެ. އަދި އިސްވެ ދެންނެވި ކަންކަން އެހެން ހުރުމުން މިޕާޓީއަށް މިހާތަނަށް ކަށަވަރުވެފައިވާ ގޮނޑިތަކުގެ އިތުރުން މާލެ އާއި އައްޑޫ ސިޓީގެ އިތުރު ގޮނޑި ލިބުމުގެ ފުރުސަތު އޮތްކަން ފާހަގަކޮށް މިވާހަކަ އާންމުކޮށް ދެންނެވީމެވެ،" ބަޔާނުގައި ބުނެފައިވެ އެވެ.
ނަމަވެސް، އެ ބަޔާނުގައި އެއްވެސް ފޮއްޓެއް އަލުން ގުނަން އެދުނު ކަމެއް ބުނެފައެއް ނުވެ އެވެ.
އެކަމާ ގުޅިގެން، އީސީގެ ނައިބު ރައީސް އިސްމާއިލް ހަބީބު "އަދަދު"އަށް ވިދާޅުވީ ބަޔަކު ހުށަހެޅި ނަމަވެސް، ފޮއްޓެއް ކަނޑައިގެން ގުނާނީ ކޮމިޝަނުގެ އުސޫލާ އެއްގޮތަށް އެކަން ކުރަން ފެނިއްޖެ ނަމަ އެވެ.
"ފޮއްޓެއް ކަނޑައިގެން ގުނާނީ ކެންޑިޑޭޓުންގެ ހާޒިރުގަ. އެފަދަ ނިންމުމެއް އަދި ނިންމާފައެއް ނެތް،" ހަބީބު ވިދާޅުވި އެވެ.
ނަމަވެސް، އޭގެ ފަހުން ހަބީބު ކުރެއްވި ޓްވީޓެއްގައި ވިދާޅުވީ ވޯޓުކަރުދާސް ބަންދުކޮށްފައިވާ ސެކިއުރިޓީ އުރައެއް "ކަނޑަންޖެހޭ ހަލަތު އައުން ގާތް،" ކަމަށެވެ.
ރާއްޖޭގެ އެންމެ ބޮޑު ދެ ސިޓީގެ މުހިއްމު ގޮނޑިތަކެއް އެމްޑީޕީއަށް ގެއްލިފައިވާއިރު، އެމްޑީޕީން މަސައްކަތްކުރަނީ ނަތީޖާ އޮޅުވާލަން ކަމަށް ތުހުމަތުކޮށް، އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ ކަންބޮޑުވުންފާޅުކޮށްފަ އެވެ.
މާލޭގެ މޭޔަރު ކަމުގެ ގޮނޑިއާއެކު، އިދިކޮޅު ޕީޕީއެމްއިން ވަނީ ސިޓީ ކައުންސިލްގެ 18 ގޮނޑީގެ ތެރެއިން 12 ގޮނޑިއެއް ކާމިޔާބުކޮށްފަ އެވެ.
އެމްޑީޕީއަށް އަނެއް ތިން ސިޓީގެ މޭޔަރުކަން ޔަގީން ކުރެވިފައިވީ ނަމަވެސް އައްޑޫ ސިޓީގެ ސުޕަ މެޖޯރިޓީ ވެސް ގެއްލުނެވެ.
އެ ޕާޓީގެ ސަޕޯޓް ބޮޑު އެހެން ބައެއް ރަށްރަށުން ވެސް ވަނީ އެމްޑީޕީއަށް މިފަހަރު ތާއިދު ކުޑަވެފަ އެވެ. ނަމަވެސް ޖުމްލަކޮށް ބަލާނަމަ، އެންމެ ގިނަ ގޮނޑި ކާމިޔާބުކޮށްފައިވަނީ އެމްޑީޕީންނެވެ.
