މިލާން (އޭޕްރީލް 12) - އިޓާލިއަން ލީގުގައި ރޭ ކަލިއަރީ އަތުން 1-0 އިން މޮޅުވެ އިންޓަ މިލާނުން ލީގުގެ އެއް ވަނައިގައި 11 ޕޮއިންޓުގެ ލީޑު ދެމެހެއްޓިއިރު، އެ ޓީމުގެ ކޯޗު އެންޓޯނިއޯ ކޮންޓޭ ވަރަށް ބޮޑަށް އުފާފާޅުކޮށްފި އެވެ.
ރޭގެ މެޗަށް އިންޓަ ނުކުތްއިރު އެ ޓީމުގެ ލީޑު އޮތީ އަށް ޕޮއިންޓަށް ކުޑަވެފަ އެވެ. އެކަމަކު ރޭ ހޯދި މޮޅާ އެކު އިންޓަ ވަނީ އަލުން ލީޑުފުޅާކޮށްފަ އެވެ. ލީގުގެ އެއް ވަނައިގައި އިންޓަ އޮތީ 30 މެޗުން 74 ޕޮއިންޓް ހޯދައިގެންނެވެ. ދެ ވަނައިގައި އޭސީ މިލާން އޮތީ 30 މެޗުން 63 ޕޮއިންޓާ އެކު އެވެ. ރޭ ޖެނޯއާ އަތުން 3-1 އިން މޮޅުވި އެންމެ ފަހުގެ ޗެމްޕިއަން ޔުވެންޓަސް އަށް 30 މެޗުން ލިބިފައިވަނީ 62 ޕޮއިންޓެވެ.
އިންޓަ ދަނޑުގައި ރޭ ކަލިއަރީން ރަނގަޅު ޑިފެންސިވް ކުޅުމެއް ދެއްކި މެޗުގައި އިންޓަގެ ކުރިއަށް ކުޅޭ ކުޅުންތެރިންނަށް ލަނޑު ޖަހަން ލިބުނު ފުރުސަތުތަކުގެ ބޭނުމެއް ނުހިފުނެވެ. މެޗުގެ 68 ވަނަ މިނިޓްގައި އިންޓަގެ ނެދަލެންޑްސް ޑިފެންޑަރު ސްޓެފަން ޑި ވްރާއި ބޮލުން ފޮނުވާލި ބޯޅައެއް ވަނީ ހުރަސްދަނޑިއަށް އަމާޒުވެފަ އެވެ.
އިންޓަގެ ހަމައެކަނި ގޯލު ޖެހީ މެޗުގެ 77 ވަނަ މިނިޓްގައި މަޓެއޯ ޑާމިއަން އެވެ. ޑާމިއަން މި ގޯލު ޖެހީ އަޝްރަފް ހަކީމީ ނަގައިިދިން ހުރަަހަކުންނެވެ. އެ ލަނޑަށް ފަހު އިންޓަ އިން ވަރަށް ބޮޑަށް އުފާފާޅުކުއިރު، ކޮންޓޭ ވެސް ވަނީ ބައިވެރިވެފަ އެވެ.
"މިހާރު ކޮންމެ މެޗެއް އެއީ ފައިނަލެއް. ފައިނަލެއްގައި މޮޅުވުމުގެ އިހުސާސް ކުރެވޭ ކޮންމެ ވަގުތެއްގައި ވަރަށް ބޮޑަށް އުފާފާޅުކުރެވޭނެ. މި މެޗަކީ ވެސް އެކަހަލަ ހާލަތެއް. ހުރިހާ ކުޅުންތެރިން ޕްރެޝަރުގައި ވެސް ރަނގަޅަށް މަސައްކަތްކޮށް ލީޑު ދަމަހައްޓައިފި،" މެޗަށް ފަހު ކޮންޓޭ ބުންޏެވެ.
ލީގުގައި އިންޓަ އިން ޖެހިޖެހިގެން ހޯދި 11 ވަނަ މޮޅާ އެކު އެ ޓީމަށް 11 އަހަރު ތެރޭ ފުރަތަމަ ފަހަރަށް ލީގު ހޯދަން ބާކީ އޮތް އަށް މެޗުން ބޭނުންވަނީ 16 ޕޮއިންޓެވެ. އިންޓަ އިން އެންމެ ފަހުން ލީގު ޗެމްޕިއަންކަން ހޯދީ 2009-2010 ވަނަ އަހަރުގެ ސީޒަނުގައި ހޯސޭ މޮރީނިއޯގެ ކޯޗުކަމުގަ އެވެ.
ޖެނޯއާ ކޮޅަށް ޔުވެންޓަސްގެ ގޯލުތައް ޖެހީ ޑޭޔާން ކުސުލެވްސްކީ އާއި އަލްވާރޯ މޮރާޓާ އަދި ވެސްޓަން މެކްކެނީ އެވެ. ޖެނޯއާގެ ހަމައެކަނި ގޯލު ކާމިޔާބުކުރީ ޖިއަންލޫކާ ސްކަމާކާ އެވެ.
