މިލާން (އޭޕްރީލް 11) - އިޓާލިއަން ލީގުގައި ރޭ ޕާމާ އަތުން 3-1 އިން އޭސީ މިލާން މޮޅުވި މެޗުގައި އެ ޓީމުގެ ތަރި ޒްލަޓަން އިބްރަހިމޮވިޗަށް ރަތް ކާޑު ދެއްކީ ރެފްރީ އަށް އޮޅުމަކުން ކަމަށް އިޓަލީގެ މީޑިއާތަކުން ރިޕޯޓްކޮށްފި އެވެ.
ރޭގެ މެޗުގެ 60 ވަަނަ މިނިޓްގައި އިބްރަހިމޮވިޗަށް ރަތް ކާޑު ދެއްކީ މެޗުގެ ރެފްރީ ފަބިއޯ މަރެސްކާއާ ދިމާލަށް ބުނި އެއްޗަކުންނެވެ. އިބްރަހިމޮވިޗަށް ރަތް ކާޑު ދެއްކުމުގެ ކުރިން އޭނާ ވަނީ މަރެސްކާއާ ވާހަކަތަކެއް ދައްކައިފަ އެވެ. އިޓަލީ މީޑިއާތަކުގައި ދައުރުވަމުން އަންނަ ވީޑިއޯގައި އިބްރަހިމޮވިޗް ރެފްރީ އަށް ބޭއަދަބީ ބަހުން މުހާތަބު ކޮށްފައެއްނުވެ އެވެ. މީޑިއާ އިން ރިޕޯޓްކުރާގޮތުގައި އިބްރަހިމޮވިޗަށް ރަތް ކާޑު ދެއްކީ އޭނާ ބުނި ބަހެއް ރެފްރީ މަރެސްކާ އަށް ރަނގަޅަށް ސާފުނުވެ އޮއްވައި އެހެން ގޮތަކަށް މާނަ ނެގުމަށް ފަހު އެވެ.
އިބްރަހިމޮވިޗަށް ރަތް ކާޑު ދެއްކިއިރު، މިލާން އޮތީ 2-0 އިން ކުރީގަ އެވެ. އެއީ އިބްރަހިމޮވިޗް ދިން ބޯޅައަކުން އަންޓޭ ރެބިޗާއި ފްރޭންކް ކެސިއޭ ޖެހި ގޯލުންނެވެ. ރަތް ކާޑަށް ފަހު ދަނޑުން ފޭބިއިރު، އިބްރަހިމޮވިޗް ވަނީ އޭނާ އަށް ރަތް ކާޑު ދެއްކި ސަބަބެއް ނޭނގޭ ކަމަށް މިލާންގެ ކޯޗު ސްޓެފާނޯ ޕިއޯލީ ގާތުގައި ބުނެފަ އެވެ.
މީޑިއާ އަށް ދިން އިންޓަވިއުއެއްގައި ޕިއޯލީ ބުނީ ރެފްރީ އަށް ބޭއަދަބީ ބަހުން މުހާތަބު ނުކުރާކަމަށް އިބްރަހިމޮވިޗް ބުނެފައިވާ ކަމަށެވެ.
އެ ރަތް ކާޑުގެ ސަބަބުން އިބްރަހިމޮވިޗަށް ދެ މެޗުގެ ސަސްޕެންޝަނެއް އަންނާނެ އެވެ. މިލާނުން އެޕީލްކުރަން ނިންމާފައިވާއިރު، އެކަން ކުރިއަށްދާނީ މެޗު ރެފްރީ މަރެސްކާގެ ރިޕޯޓަށް ބެލުމަށް ފަހު އެވެ. އާންމު ގޮތެއްގައި އެ ގޮތަށް ދައްކާފައި ހުރި ރަތް ކާޑުގެ ސަސްޕެންޝަން އެއް މެޗަށް ކުޑަކޮށްދީފައި އެބަހުއްޓެވެ.
މި މެޗުން ލިބުނު މޮޅާ އެކު މިލާން ލީގުގެ ދެ ވަނައިގައި އޮތީ 30 މެޗުން 63 ޕޮއިންޓާ އެކު އެވެ. އެއް ވަނައިގައި އޮތީ 29 މެޗުން 71 ޕޮއިންޓް ހޯދައިގެން އިންޓަ މިލާން އެވެ. އެންމެ ފަހުގެ ޗެމްޕިއަން ޔުވެންޓަސް ތިން ވަނައިގައި އޮތީ 29 މެޗުން 59 ޕޮއިންޓް ހޯދައިގެންނެވެ.
