އަންނަ މަހު ރާއްޖޭގައި ބާއްވަން ނިންމާފައިވާ އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ މެޗުތަކާއި ރާއްޖޭގެ ލޯކަލް ފުޓްބޯޅަ ސީޒަނުގައި އެހީތެރިވުމުގެ ގޮތުން އޭޑީކޭ ހޮސްޕިޓަލާ އެކު އެފްއޭއެމުން އެއްބަސްވުމެއްގައި ސޮއިކޮށްފި އެވެ.
އެފްއޭއެމްގެ ފަރާތުން އެއްބަސްވުމުގައި ސޮއިކުރެއްވީ އެ އެސޯސިއޭޝަނުގެ ޖެނެރަލް ސެކްރެޓަރީ ހުސެއިން ޖަވާޒް އެވެ. އޭޑީކޭގެ ފަރާތުން އެއްބަސްވުމުގައި ސޮއިކުރެއްވީ އެ ހޮސްޕިޓަލްގެ މެނޭޖިން ޑިރެކްޓަރު އަހުމަދު އައްފާލް އެވެ.
އެއްބަސްވުމާ ބެހޭގޮތުން އެފްއޭއެމުން ބުނީ ރާއްޖޭގައި ކުޅޭ އޭއެފްސީ ކަޕްގެ މެޗުތަކުގައި ސިއްހީ ގޮތުން ދޭންޖެހޭ އެހީތެރިކަން އޭޑީކޭ އިން ފޯރުކޮށްދޭނެ ކަމަށާއި ލޯކަލް ފުޓްބޯޅަ ސީޒަނުގެ ބާކީ ބައިގައި ވެސް އޭޑީކޭ ހޮސްޕިޓަލްގެ ފަރާތުން އެހީތެރިކަން ލިބޭނެ ކަމަށެވެ.
މީގެ ކުރިން ވެސް ފުޓްބޯޅައިގެ އިތުރުން ކުޅިވަރުގެ އެކި ކަންކަމުގައި އޭޑީކޭގެ ފަރާތުން އެހީތެރިކަން ވަނީ ލިބިފަ އެވެ.
އަންނަ މަހު 14 އިން 21 އަށް މާލޭގައި ކުރިއަށްދާ އޭއެފްސީ ކަޕްގެ ގްރޫޕް ޑީގައި ވާދަކުރުމުގެ ފުރުސަތު މި ވަގުތު ލިބިފައިވާ ރާއްޖޭގެ ހަމައެކަނި ޓީމަކީ މިދިޔަ އަހަރުގެ ޗެމްޕިއަން މާޒިޔާ އެވެ. ދެން މި ގްރޫޕްގައި އޮތީ ބަންގްލަދޭޝްގެ ބަޝުންދުރާ ކިންގްސް އާއި އިންޑިއާގެ އޭޓީކޭ މޯހަން ބަގާން އެވެ. ގްރޫޕްގެ ފަހު ޖާގަ ލިބޭނީ ކޮލިފައިން ކާމިޔާބުކުރާ ޓީމަކަށެވެ.
ކޮލިފައިން ފުރަތަމަ ބުރުގައި އޮތް ޓީމުތަކަކީ ރާއްޖޭގެ އީގަލްސް, ބޫޓާންގެ ތިމްޕޫ ސިޓީ, ނޭޕާލްގެ އާމީ ކްލަބް އަދި ސްރީލަންކާގެ ޕޮލިހެވެ. ކޮލިފައިން ފުރަތަމަ ބުރުން މޮޅުވާ ޓީމުތައް ކޮލިފައިންގެ ދެ ވަނަ ބުރުގައި އިންޑިއާގެ ބެންގަލޫރާއި ބަންގްލަދޭޝްގެ ޑާކާ އަބަހާނީއާ ދެކޮޅަށް ކުޅޭނެ އެވެ. ކޮލިފައިން ކާމިޔާބުކޮށް ގްރޫޕް ސްޓޭޖުން ފުރުސަތު ލިބޭނީ ޕްލޭއޮފުން މޮޅުވާ ޓީމަކަށެވެ.
އޭއެފްސީ ކަޕްގެ ކޮލިފައިންގައި މާދަމާ ހަވީރު ބޫޓާންގެ ޗެމްޕިއަން ތިމްޕޫ ސިޓީއާ ދެކޮޅަށް އީގަލްސް ކުޅޭނެ އެވެ. މެޗުގެ ކުރިން އޭއެފްސީ ޕްރޮޓޮކޯލްގެ ތެރެއިން އީގަލްސް އާއި ތިމްޕޫގެ ކުޅުންތެރިން ވަނީ ކޮވިޑް އަށް އިއްޔެ ޓެސްޓްކޮށްފަ އެވެ.
ތިމްޕޫ އާއި އީގަލްސް ކުޅޭ މެޗު ފަށާނީ މާދަމާ ހަވީރު 4 ޖަހާއިރު އެވެ.
