މެޑްރިޑް (އޭޕްރީލް 6) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި މިރޭ އަމިއްލަ ދަނޑުގައި ލިވަޕޫލާ ދެކޮޅަށް ކުޅޭއިރު, އެ ޓީމާ މެދު ގޮތެއް ނިންމަންޖެހެނީ ހަމައެކަނި ފޯވާޑުންނަށް ބަަލައިގެން ނޫން ކަމަށް ރެއާލް މެޑްރިޑްގެ ކޯޗު ޒިނެދިން ޒިދާން ބުނެފި އެވެ.
"ލިވަޕޫލަކީ ފުރިހަމަ ޓީމެއް. ތެދެއް. އެ ޓީމުގެ ފޯވާޑުން ވަރަށް މޮޅު ވަރަށް ރަނގަޅު. އެކަމަކު ޓީމެއްގެ ގޮތުގައި ލިވަޕޫލަށް ބަލާއިރު ފެންނަނީ ހަމައެކަނި ފޯވާޑުންނެއް ނޫން. ސެޓެއްގެ ގޮތުގައި އެ މުޅި ޓީމު ކުޅޭ ގޮތް ވެސް ރަނގަޅު. އެހެންވީމަ ހަމައެކަނި ފޯވާޑުންނަށް ބަލައިގެން މީގެ ގޮތެއް ނުނިންމޭނެ," މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޒިދާން ބުންޏެވެ.
މީގެ ކުރިން ކްލޮޕާއި ޒިދާން ވަނީ ޗެމްޕިއަންސް ލީގުގައި ބައްދަލުކޮށްފަ އެވެ. އެއީ 2018 ވަނަ އަހަރު ޔޫކްރޭނުގެ ކިއޭވްގައި ކުޅުނު ޗެމްޕިއަންސް ލީގުގެ ފައިނަލުގަ އެވެ. އެ މެޗުން ރެއާލް ވަނީ 3-1 އިން މޮޅުވެފަ އެވެ. ޒިދާން ބުނީ އެ މެޗުގެ ބަދަލުހިފަން ލިވަޕޫލުން ވިސްނަފާނެ ކަމަށް ނުބެލެވޭ ކަމަށާއި އެ މެޗަކީ މާޒީ ކަމަށެވެ.
ޒިދާން ބުނީ ކްލޮޕަކީ ކޯޗިން ކެރިއަރުގައި ކާމިޔާބު މަސައްކަތްތަކެއް ކޮށްފައިވާ ކޯޗެއް ކަމަށާއި އެހެން ނަމަވެސް އޭނާގެ މަސައްކަތްތައް ކޮޕީކުރަން ބޭނުމެއް ނޫން ކަމަށެވެ. ހަމައެގޮތަށް ކްލޮޕް ވެސް އޭނާގެ މަސައްކަތްތައް ކޮޕީ ކުރާނެ ކަމަށް ނުބެލެވޭ ކަމަށް ޒިދާން ބުންޏެވެ.
"އެއްވެސް ކޯޗެއް ކޮޕީއެއް ނުކުރާނެ. މީގެ އަމިއްލަ މަސައްކަތުގެ ތެރެއިން ދިރާސާ ކުރުމަކީ ނެތް ކަމެއް ނޫން," ޒިދާން ބުންޏެވެ.
ލިވަޕޫލްގެ މިސްރު ފޯވާޑް މުހައްމަދު ސަލާހު ރެއާލަށް ބަދަލުވާން ބޭނުންވާ ކަމަށް ބުނެ, ސްޕެއިނާއި މިސްރުގެ ބައެއް މިޑިއާ ރިޕޯޓްކޮށްފައިވާއިރު, އެކަމާ ބެހޭގޮތުން ޒިދާން ވާހަކަ ދައްކަން ދެކޮޅު ހެދި އެވެ. ޒިދާން ބުނީ ސަލާހަކީ ލިވަޕޫލް ކުޅުންތެރިއެއް ކަމަށާއި އެހެންކަމުން އެހެން ކްލަބެއްގެ ކުޅުންތެރިއެއްގެ ވާހަކަ ދައްކަން ބޭނުންނުވާ ކަމަށެވެ.
މިރޭގެ މެޗަށް ނުކުންނައިރު ރެއާލްގެ ކެޕްޓަން ސާޖިއޯ ރާމޯސް އަށް އަނިޔާގެ ސަބަބުން ނުކުޅެވޭނެ އެވެ. އެކަމަކު ޒިދާނަށް އޮތް ހިތްހަމަޖެހުމަކީ އަނިޔާއިން ރަނގަޅުވެ އެޑެން ހަޒާޑް ޓީމުގެ ފަރިތަކުރުންތަކުގައި ބައިވެރިވާން ފެށުމެވެ. ޒިދާން ބުނީ ހަޒާޑް ބޭނުންކުރާނީ ވަރަށް ވިސްނުންތެރިކަމާ އެކު 100 ޕަސެންޓް އޭނާގެ ފިޓްނަސް ކަށަވަރުކުރުމަށް ފަހު ކަމަށެވެ.
ރެއާލުން މި ސީޒަނުގައި ޗެމްޕިއަންސް ލީގާއި ސްޕެނިޝް ލީގު ހޯދަން މަސައްކަތްކުރާއިރު, އެކަން އެ ޓީމަަށް ހާސިލްކުރެވިދާނެ ކަމަށް ޒިދާން ގަބޫލުކުރެ އެވެ. އަދި ސީޒަންގެ ކުރީކޮޅުގައި ނަތީޖާ ނުނެރެވުމުން ކޮންމެ ވެސް ވަރެއްގެ މާުޔޫސްކަމެއް ކުރިމަތިވި ކަމަށާއި އެކަމަކު މެޗުތަކުން މޮޅުވާން ފެށުމުން އެ ހާލަތު ބަދަލުވެފައިވާ ކަމަށެވެ. ލިވަޕޫލާއި ރެއާލް މެޗު ފަށާނީ މިރޭ 00:00 ގަ އެވެ.
