ރައީސް އިބްރާހިމް މުހައްމަދު ސޯލިހު މިއަދު ކޮވިޑް-19 އިން ރައްކާތެރިވުމަށް އުފައްދާފައިވާ ވެކްސިންގެ ދެވަނަ ޑޯޒް ޖައްސަވައިފި އެވެ.
މިދިޔަ ފެބްރުއަރީ މަހުގެ އެއް ވަނަ ދުވަހު ރާއްޖޭގައި ކޮވިޑު ވެކްސިންގެ ޕްރޮގްރާމް ފެށި ދުވަހު ރައީސް ވަނީ ވެކްސިންގެ ފުރަތަމަ ޖައްސަވައިފަ އެވެ.
ފެބްރުއަރީ ނުވަ ވަނަ ދުވަހުގެ ކުރިން ވެކްސިންގެ ފުރަތަމަ ޑޯޒް ޖެހި މީހުންނަށް ވެކްސިންގެ ދެވަނަ ޑޯޒް މިހާރު ވަނީ ދޭން ފަށައިފަ އެވެ.
އެންމެ ފުރަތަމަ ކޮވިޝީލްޑް ވެކްސިން ދިންއިރު، ފަހުން ވަނީ ޗައިނާގެ ސިނޮފާމް ވެކްސިން ވެސް ދޭން ފަށައިފަ އެވެ.
ކޮވިޝީލްޑް ވެކްސިން ޖެހި މީހުންނަށް އަށް ހަފްތާ ފަހުން ދެ ވަނަ ޑޯޒް ޖަހައި ދޭއިރު ސިނޮފާމް ޖެހި މީހުންނަށް 2-4 ހަފްތާގެ ތެރޭގައި ދެވަނަ ޑޯޒް ޖަހައިދެ އެވެ.
ވެކްސިން ފުރިހަމަ ކުރެއްވުމަށްފަހު ރައީސް ސޯލިހު ވަނީ ފުރަތަމަ ޑޯޒް ޖެހިފަހުން އަށް ހަފްތާ ވެފައިވާނަމަ ލަސްނުކޮށް ވެކްސިންގެ ދެވަނަ ޑޯޒް ޖެހުމަށް އިލްތިމާސް ކުރައްވައިފަ އެވެ.
އަދި ފުރަތަމަ ނުޖަހާ ތިބި މީހުން ވެސް އަވަހަށް ވެކްސިން ޖެހުމަށް އެމަނިކުފާނު ވަނީ އެދިވަޑައިގެންފަ އެވެ.
ވެކްސިންގެ ދެ ޑޯޒް ފުރިހަމަ ކުރުމުން ކަރަންޓީން ނުވެ އަތޮޅުތެރެއަށް ދިއުމުގެ ހުއްދަ ދިނުންފަދަ ލުއިތަކެއް ދޭން ވަނީ ނިންމާފަ އެވެ.
ކޮވިޑް ވެކްސިނަށް ބޮޑު ތަރުހީބެއް ލިބިގެންދިޔައިރު މިހާތަނަށް ދެ ލައްކައަށް ވުރެ ގިނަ މީހުން ވަނީ ރާއްޖޭން ވެކްސިން ޖަހައިފަ އެވެ. މާލޭގެ އިތުރުން ރާއްޖޭގެ ހުރިހާ ރަށެއްގައި ވެސް ވަނީ ވެކްސިން ދީފަ އެވެ.
ވެކްސިންގެ ފުރަތަމަ ޑޯޒާއި ދެ ވަނަ ޑޯޒާ ދެމެދު މާ ގިނަ މުއްދަތެއް ނަގައިފި ނަމަ ބައްޔަށް ހުށަހެޅުމުގެ ފުރުސަތު ބޮޑުވާތީ ލަސްނުކޮށް ވެކްސިން ފުރިހަމަކުރަން ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ބުނެފަ އެވެ.
