ބޯހިޔާވަހިކަމުގެ ސިޔާސަތުގައި އަތޮޅުތަކަށް ހާއްސަކޮށްގެން އަންނަ އަހަރުގެ ތެރޭގައި 1.5 ބިލިއަން ރުފިޔާގެ ހައުސިން މަޝްރޫއުތައް ކުރިއަށް ގެންދަން ރާވާފައިވާ ކަމަށް ހައުސިން މިނިސްޓަރު އަސްލަމް މިދިޔަ ބުރާސްފަތިދުވަހު ވިދާޅުވެއްޖެ އެވެ.
މިނިސްޓަރު އަސްލަމް "އަދަދު" އަށް ވިދާޅުވީ އަތޮޅުތަކުގައި ކުރިއަށް ގެންދަން ރާވާފައިވާ ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ)ގެ ދަށުން ވިސްނުން ހުރީ ޖާގައިގެ ދަތިކަން ހުރި ރަށްތަކުގައި ރޯ ހައުސް އެޅުން ކަަމަށެވެ.
"އޭގައި އަޅުގަނޑުގެ ޕްރެފަރަންސް އަކީ ޖާގަ، ބިން ހުރި ތަންތަނުގައި ސިންގަލް ސްޓޯރީ ރޯ ހައުސް. ޖާގައިގެ ދަތިކަން ކޮންމެވެސް ވަރަކަށް ހުރި ތަންތަނުގައި ޓޫ ސްޓޯރީ ރޯ ހައުސަސް. ދެން ބިން ވަރަށް ބޮޑަށް ދަތިވެފަ ހުރި ތަންތަނުގަ ފްލެޓްސް," އަސްލަމް ވިދާޅުވި އެވެ.
މިނިސްޓަރު ވިދާޅުވި ގޮތުގައި, ރަށްރަށުގައި ފްލެޓް އަޅާނީ އިމާރާތް ފަސް ބުރިއަށް ވުރެން އުސް ނުވާނެ ގޮތަކަށެވެ.
މާލެ ހިމެނޭ ގޮތަށް މި އަހަރުގެ ތެރޭގައި ވެސް އަވަހަށް ހައުސިން މަޝްރޫއުތަކެއް ފަށަން ވަނީ ނިންމައިފަ އެވެ. އަތޮޅުތަކުގައި ބައެއް މަޝްރޫއުތައް ކުރިއަށްދާއިރު މާލެ ސަރަހައްދުގައި 5,000 ފްލެޓް އަޅަން ވަނީ އެކި ފަރާތްތަކާ އެކު ސޮއިކޮށްފަ އެވެ. އޭގެތެރޭގައި އެންމެ ހާލުގައި އުޅޭ މީހުންނަށް ދޭން ނިންމާފައިވާ ކައުންސިލް ހައުސިންގެ ޔުނިޓްތައް ވެސް ހިމެނެ އެވެ.
