މިއުނިކް (އޭޕްރީލް 4) - ޖަރުމަނު ލީގުގެ ދެ ވަނައިގައި އޮތް އާރްބީ ލައިޕްޒިގުގެ ދަނޑުގައި ރޭ 1-0 އިން މޮޅުވެ ބަޔާން މިއުނިކުން އެއް ވަނައިގައި ހަތް ޕޮއިންޓަށް ލީޑުފުޅާކޮށްފި އެވެ.
އެންމެ ފަހުގެ ޗެމްޕިއަން ބަޔާން އެއް ވަނައިގައި އޮތީ 27 މެޗުން 64 ޕޮއިންޓާ އެކު އެވެ. ދެ ވަނައިގައި ލައިޕްޒިގު އޮތީ 27 މެޗުން 57 ޕޮއިންޓް ހޯދައިގެންނެވެ.
ރޭގެ މެޗުގައި ފެނިގެންދިޔަ ހަމައެކަނި ގޯލު މެޗުގެ 38 ވަނަ މިނިޓްގައި ކާމިޔާބުކުރީ ބަޔާންގެ ޖަރުމަނު މިޑްފީލްޑަރު ލެއޯން ގޮރެޓްޒްކާ އެވެ. އޭނާ މި ގޯލު ޖެހީ ތޯމަސް މުލާ ތަނަަވަސްކޮށްދިން ފުރުސަތަކުންނެވެ. ލައިޕްޒިގުން ވެސް ލަނޑު ޖަހާނެ ފުރުސަތުތަކެއް ތަނަަވަސްކުރި މި މެޗުގައި އެ ޓީމަށް ގޯލެއް ޖަހައިދިނުމާ އެންމެ ގާތަށް ޖެހިލީ ލައިޕްޒިގުގެ ކެޕްޓަން މާސެލް ސަބިޓްޒާ އެވެ. ސަބިޓްޒާ ޖެހި ޝޮޓް ބަޔާންގެ ކީޕަރު މެނުއަލް ނޯޔާ ވަނީ މަތަކޮށްފަ އެވެ.
އަނިޔާގެ ސަބަބުން ރޭގެ މެޗުގައި ބަޔާންގެ އެއް ވަނަ ފޯވާޑް ރޮބަޓް ލެވަންޑޯސްކީ ނުކުޅެ އެވެ. ބަޔާން ދެން އެންމެ އަވަހަށް ޗެމްޕިއަންސް ލީގުގެ ކުއާޓާ ފައިނަލުގައި ޕީއެސްޖީއާ ދެކޮޅަށް ކުޅޭ މެޗުގައި ވެސް މިދިޔަ އަހަރު ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދި ލެވަންޑޯސްކީ އަށް ނުކުޅެވޭނެ އެވެ.
ޖަރުމަނު ލީގުގެ ގަދަބާރު ބޮރޫޝިއާ ޑޯޓްމަންޑް ރޭ ކުޅުނު މެޗުން ވަނީ އަމިއްލަ ދަނޑުގައި 2-1 އިން އެއިންޓްރަކްޓް ފްރޭންކްފާޓް އަތުން ބަލިވެފަ އެވެ. މި ނަތީޖާއާ އެކު ޑޯޓްމަންޑް ލީގުގެ ފަސް ވަނައިގައި އޮތީ 27 މެޗުން 43 ޕޮއިންޓް ހޯދައިގެންނެވެ.
